Awor tin hasta un abogado Hulandes
ORANJESTAD (AAN) – Awe mainta den un sala di Corte di Husticia, lo bay sigui cu e parti pro forma di caso Avestruz. Na Februari 2022, Hues a rechaza peticion di abogadonan mr. Kock y mr. Illes kendenan a pidi pa haya e documentonan cu Sevinger a duna Polis.
Na Februari 2022, abogado mr. Oomen a reacciona riba e punto di bista di e dos Fiscalnan riba e peticion di abogadonan mr. Kock y mr. Illes pa facilita copia di e documentonan cu Sevinger e entrega na Polis. Ta asina cu e dos Fiscalnan a nenga e peticion aki Diamars y a bisa cu e documentonan cu Sevinger a entrega na Polis, no ta relevante.
Mr. Oomen a bisa cu esaki ta preocupante. El a remarca na Hues cu e ta haya cu Fiscalnan ta pone solamente documentonan cu nan ta haya ta bon. Esey na opinion di mr. Oomen no ta corecto pa un proceso di husticia husto.
E abogado a bisa cu e ta haya e documentonan cu Sevinger a duna Polis importante pa hiba defensa di su clientenan. Tambe mr. Oomen a bisa cu e documentonan por hasta yuda pa cu e castigo. E abogado a pidi Hues pa aproba su peticion pa haya e documentonan pasobra esaki por perhudica su clientenan den e caso.
Despues di mr. Oomen a sigui abogadonan mr. Carlo y mr. Arendsz Marchena, kendenan a uni na e peticion di mr. Oomen. Tambe nan a mustra cu tin paginanan den e documentonan cu no a sali bon.
FISCAL
Fiscal a bisa Hues cu nan ta persisti cu no ta necesario pa pasa e documentonan di Sevinger. Fiscal tambe a bisa Hues cu e fecha tentativo di 1 April 2022 no ta realisabel pasobra e y su colega lo no ta na Aruba.
HUES TA RECHAZA PETICION DI ABOGADONAN
Hues a pospone e caso un rato pa bay pensa riba e peticion di abogadonan y tambe pa fiha un fecha pa e otro caso pro forma.
Hues a bolbe y a bisa cu relaciona cu e peticion pa cu e documentonan cu Sevinger a entrega na Polis, e ta haya cu tur documentonan ta importante y Fiscal ta responsabel pa e documentonan. Hues a rechaza e peticion aki.
Hues a pospone e caso pa awe 1 April 2022.
ABOGADO HULANDES
Ayera merdia DIARIO por a constata cu abogado mr. Carlo tabata papia cu un abogado dama Hulandes. Por a compronde cu e abogado aki a bin special pa e caso Avestruz awe. DIARIO lo informa mas di e caso aki.
