ORANJESTAD (AAN): Durante e dianan aki cu tin reglanan extra imponi riba tur scol y negoshi, ta conoci cu e horario di ciere a bira mas trempan. A resulta cu na Colegio Arubano tambe den Vondellaan, a dicidi cu e portanan grandi
(pa auto pasa) ta wordo cera trempan.
Aparentemente un docente di Avond HAVO no tabata sa di esaki, y tabata dunando les y su vehiculo mes tabata staciona den tereno di scol.
Diahuebs anochi ora cu el a caba di duna les, pa 7:55 pm el a subi su vehiculo cu intencion di bay cas. Yegando na e salida principal pa Vondellaan for di Colegio Arubano, el a bin haya e gate grandi full cera cu candal. El a dicidi di bay un tiki mas pazuid pa e di segundo salida cu tin pa Vondellaan, y a nota cu aki tambe e ta cera!
E docente a sigui bay zuid eynan, bira bay pariba pa check si e salida na Shakespearestraat net patras di Lerarenkamer ta habri, pero a haya daks den wowo. E gate ey tambe ta cera na lock.
Di eynan el a bira bay bek di mesun rumbo cu el a bin, y a bay mira si e salida pa pasa via Centro Deportivo Oranjestad ta habri. Aki e porta di e Centro ta habri, sinembargo e ‘porta mey-mey’ pa sali for di Colegio Arubano ta na candal.
Su ultimo recurso ta pa bay mira si acaso e gate cu tin den Shakespearestraat mas pariba, cerca di Mon Plaisir College ta habri. El a yega eynan y nota cu lamentablemente esey tambe ta cera.
E docente bisti cu carson preto y camisa blanco e ora a para su auto eynan, y na pia a cana bay na oficina di Administratie di Avond HAVO pa pidi yudanza. Aki a drenta den contacto cu e sleutelhouder di e portanan di Colegio, kende a bisa cu e lo bin bek pa habri e porta patras eynan cu ta cerca di Stadion Guillermo Trinidad.
Ey ta unda e docente a bay sinta riba un pida stupi, ta disfruta di un cigaria y warda te ora cu nan a bin habri e porta pa e por a sali cu su auto y bay cas.
