ORANJESTAD (AAN) – Ohala Aruba lo tabata tin mas productonan local, pa loke ta agricultura. Ultimo temponan, hopi di e berduranan cu ta wordo importa, ta bin di hopi mal calidad y dos cu, diferente consumidor ta keda di esey, ta awacati y
chayote.
Un consumidor a comparti cu nos redaccion e potret di un chayote cu el a caba di cumpra den un supermercado, y mester a bay directamente pa bari di sushi, ora cu el parti e berdura pa traha un receta.
Pafo e chayote tabata mustra bunita, casca berde, fresco, pero paden tabata pasa caba. E consumidor a comenta cu esaki no ta un berdura cu eigenlijk ta putri, pero ora e color di carni paden ta bira gel pa maron, e smak ta bira hopi amarga y ni maske cuanto condimento por pone den dje, e ta keda smak malo.
E consumidor no a logra averigua di unda e chayotenan ta wordo trece pa Aruba, pero pa trece un producto di asina mala calidad cu mester bente afo ora bo a caba di cumpre, no ta bal la pensa ni mes pa wordo importa. Tampoco e consumidor tin tempo pa bay supermercado pa reclama, pasobra e casca no ta mustra malo pafo, y sigur esun encarga cu e berduranan no ta bay tuma tempo pa wak cual ta malo of cual no. Miho cos ta pa no trece mas e sorto di chayote di asina mal calidad na Aruba.
Y ta trata di chayote tierno, pasobra nan tabata trece esun di casca duro por wordo sembra den cualkier cura di cas, pasobra e ta broei den clima cayente, y su raiz tambe ta hopi alimenticio y dushi. Pero e sorto di chayote di casca duro y un poco aruga, y algun hasta cu sumpiña, no ta wordo importa pa nos Isla.
