Micheline Mathurin di Fundacion Respeta Mi:
ORANJESTAD (AAN): Fundacion Respeta Mi december e aña aki ta celebra nan di 35 aniversario promoviendo conscienciacion, prevencion y educacion contra abuso di mucha. Pa mas di tres decada e fundacion ta traha hunto cu scol, famia y comunidad pa proteha y defende bienestar di nos muchanan. Señora Micheline Mathurin di e fundacion, den un entrevista cu DIARIO a enfatisa cu colaboracion entre tur instancia ta necesario pa combati abuso di mucha.
El a indica cu pronto e fundacion lo informa comunidad tocante nan actividadnan pa april, cu ta Luna Internacional di Prevencion di Abuso di Mucha y pa December cu ta luna di celebracion di nan 35 aña di existencia.
Fundacion Respeta Mi actualmente ta trahando pa fortalece colaboracion cu Corsou y Bonaire y riba e trabaonan di prevension riba e islanan. Pronto nan lo ta na Corsou pa un session pa profesionalnan riba e tema di abuso di mucha.
Señora Mathurin a duna di conoce cu cifranan di abuso na Aruba no ta bahando. Y nan funcion como fundacion ta pa trece mas conscientisacion den pueblo. Segun e, mas prevension wordo haci, mas consciente nos pueblo ta bira, y mas caso di abuso di mucha ta keda exponi. Esaki ta un indicacion cu e casonan ta wordo ‘getackled’ door di e conscientisacion di prevension cu ta yegando hogarnan na Aruba. Esaki, segun e, ta bon cu casonan ta sali enbes di baha pasobra di e manera aki tambe por tackle e problema for di su raiz.
Tambe, el a menciona cu hopi caso di abuso di mucha no ta wordo raporta door cu ciudadanonan ta prefera di sconde pasobra nos ta biba riba un isla chikito caminda tur hende conoce otro.
Señora Mathurin a splica cu pa miho resultado pa preveni, conscientisa y combati abuso di mucha, mester tambe tin miho colaboracion entre fundacionnan, polis, scolnan, instancianan local y internacional, sector di salubridad, entre otro.
Por comunica cu Fundacion Respeta Mi via Whatsapp na 564-0270.
