President Parlamento di St. Maarten, Sarah Wescot-Williams:
ORANJESTAD (AAN): Presidente di Parlamento di St. Maarten, Sarah Wescot-Williams, a expresa satisfaccion cu resultado di e reunionnan reciente di Ipko, unda Aruba a fungi como anfitrion. Segun e presidente, apart di e discusionnan intenso, e conclucionnan alcansa ta di gran importancia, particularmente tocante continuidad di varios punto riba e agenda pa e proximo Ipko.
“St. Maarten ta hopi contento cu e conclucionnan di Ipko. E discusionnan tabata importante, pero e hecho cu nos a logra acuerdonan pa sigui cu cierto punto den e proximo Ipko ta hopi satisfactorio pa nos,” Wescot-Williams a declara.
Segun el a expresa, un di e temanan principal cu St. Maarten lo sigui impulsa ta e relacionnan financiero den Reino Hulandes. Segun e Presidente, e cuestion aki mester keda un punto permanente di discusion entre e paisnan y a enfatisa cu di banda di St. Maarten, lo sigui mantene e tema di relacionnan financiero den Reino como un punto di prioridad.
Ademas, e siguridad di e paisnan den region ta importante pa St. Maarten. “Aunke nos no ta directamente envolvi den accionnan geopolitico actual, cualkier decision tuma door di stakeholdernan grandi por tin impacto riba tur nos, incluyendo St. Maarten,” el a remarca.
St. Maarten ta alinia cu Aruba, Curaçao y Bonaire pa mantene e asunto di finansa y siguridad riba e agenda di Ipko. Tambe ta sostene temanan manera envehecimento di poblacion, educacion, cambio climatico y e deficit democratico y e rapportnan cu mester sigui.
Tocante e debe relaciona cu Covid-19, e Presidente a indica cu no tawatin un discusion specifico riba esaki durante e reunionnan formal. E tema ta cay bou di e marco general di relacionnan financiero y situacion di debe di e paisnan. Pero si, el a expresa cu e ta spera cu esaki lo bira un punto di agenda den e siguiente Ipko.
Segun Wescot-Williams, cu e resultado aki, St. Maarten ta confirma su compromiso pa un dialogo structural, continuo y enfoca riba sostenibilidad financiero, stabilidad institucional y siguridad regional, den cooperacion cu demas pais den Reino Hulandes.
