HAVA ta informa:
ORANJESTAD (AAN): HAVA (Asociación di Dokternan di Cas) a duna claridad riba un ahuste implementa recientemente den e polisa di cobertura di remedi di AZV. Esakinan ta referi, entre otro, na remedinan manera pildonan pa drumi y ansiedad, cu hasta awor tabata cubri bou di cierto condicion.
AZV tabatin planifica pa exclui e remedinan aki for di su cobertura a partir di 1 di juni 2025. Sinembargo, esey a resulta den confusion tanto na banda di aseguradonan como na boticario y profesional di salud.
Como consecuencia, AZV a opta pa prolonga temporalmente e cobertura aki pa e remedinan menciona, siguiendo e criterio ya estableci, durante un periodo di transicion cu ta keda vigente for di 12 di juni te 30 di september 2025.
HAVA ta enfatiza cu esaki ta un medida provisional. Un ahuste final den e polisa di cobertura lo drenta na vigor dia 1 di october 2025.
HAVA ta recomenda e aseguradonan pa tuma nota di e fecha importante aki y haya informacion cerca dokter di cas si tin duda.
