ORANJESTAD (AAN): Un total di 1.500 video di Fundashon Históriko Kultural Boneriano (FuHiKuBo) ta riba e plataforma digital, www.coleccion.aw .
Esaki ta resultado di un cooperacion cu a bira realidad entre FuHiKuBo y BNA, den cual Peter Scholing di BNA y Edric Croes di Archivo Nacional Aruba (ANA) ta hunga un papel importante.
Loke FuHiKuBo no por a logra riba su mes a bira realidad danki na un cooperacion cu Aruba. Pa FuHiKuBo esaki ta un paso importante, segun Bòi Antoin, presidente di e fundashon aki, cu tin casi 27 aña caba trahando pa salvaguardia patrimonio cultural Boneriano, tambe dunando aporte na otro otro islanan cu grabacion di nan hende grandinan.
E proceso pa pone produccionnan di FuHiKuBo riba www.coleccion.aw a cuminsa algun aña pasa, pero na luna di april a conoce un aceleracion, momento cu Bòi Antoin durante un bishita di trabou realisa na Aruba a entrega un ‘external hardrive’ cu un cantidad di 2165 programa Herensia ‘Aki Boneiru’ y documental na Peter Scholing y Edrick Croes. Ainda falta pa ‘upload’ masomenos 900 video riba www.coleccion.aw.
Pues gradualmente tur hende interesa pa mira e produccionnan audiovisual di FuHiKuBo por haci uso di e siguiente linknan pa yega direct na nan: https://coleccion.aw/fuhikubo òf
coleccion.aw/herensia.
E potret ta mustra recien ora cu Boi Antoin a entrega un hard disc drive externo cu 2.165 produccion di ‘Herensia’ na Peter Scholing y Edrick Croes di Biblioteca y tambe Archivo Nacional.
