ORANJESTAD (AAN): Den un entrevista cu Jennifer Arends-Reyes di Fraccion di AVP, kende ta e President di Comision di Turismo di Parlamento,
a papia riba con druk e area di Playa ta bira ora cu tin hopi crusero den Waf Oranjestad.
Aki ta unda cu ‘planning’ ta hopi importante! Segun su conocemento, Arends-Reyes a splica cu hopi barco crusero ta planea pa nan yega Aruba den oranan di mainta, pa asina nan pasaheronan por goza di nan dia na e isla.
Bishita di cruseronan na Aruba tambe tin nan parti di High-Season y Low-Season, y naturalmente den e parti di planning aki, no ta tur ora ta haya cu tur barco por keda den dia. Tin barco cu ta yega Waf den atardi, y e ora nan ta “pasa anochi” na e isla, y sa pasa den fin di siman.
El a indica cu den bon cooperacion cu comerciantenan den area di Waf, nan ta habri pa atende pasaheronan. Pero ta yega un punto cu no por ricibi tur barco pareu debi cu e por ocasiona otro tipo di congestion.
Hopi planning di High-Season, mayoria compania crusero ta trata pa nan djis keda di mainta te atardi of anochi.
Jennifer Arends-Reyes ta kere cu tin di bay sinta hunto cu tur stakeholders, incluyendo comerciantenan na Playa y tambe operadornan di Arutram, pa asina bin cu bon comunicacion den parti di planning. Si sa di antemano caba ta cua barco ta poni riba schedule pa bishita Aruba, sigur e cooperacion lo por tey di tur banda.
Comision di Parlamento tin di bay bishita Aruba Ports Authority ainda pa haya sa nan input riba planning pa cu e parti aki. Tin biaha sa socede cu ora tin problemanan internacional cu dificultadnan geo-politico, e por reduci cantidad di pasahero den barconan. Pero te ainda booking abordo di barconan rumbo pa Aruba ta mustra stabil, pero toch lo kier sa con tur esaki lo por bay impacta Aruba.
