Coach di Bida Faridi Abdul a brinda un interesante tayer na clientenan di FAVI

ORANJESTAD (AAN) Como Coach di Bida, Faridi Abdul a brinda un tayer di trabao tocante motivacion, na clientenan Di Fundacion pa Personanan cu Limitacion Visual (FAVI).

   El a splica e clientenan di FAVI kico motivacion ta, di con e ta importante, el a elabora tocante metanan y con pa traha riba metanan.

   Conhuntamente, nan a haci ehercicionan. Nan a haya tres ehercicio cu tin di haber cu locual ta motiva nan, y djey a sali hopi cosnan externo cu ta motiva nan. E otro ehercicio a consisti di un storia cu Faridi a conta nan, unda e protagonista ta un persona cu tin un limitacion, y con el a motiva su mes pa yega na e meta di haya un trabao, cu locual e ta masha contento. Djey nan a mester bisa e coach kico nan ta kere cu ta e motibo cu e persona aki a logra su metanan ey.

   E ultimo ehercicio ta skirbi nomber di cinco motivadornan di nan mes, y pa aña 2026 kico ta e metanan cu nan kier cumpli. Y si tin algo cu por impedi nan esey, skirbi kico nan por haci pa cambia loke ta impedi nan pa algo positivo pa toch nan yega na nan meta. Pues, practicamente el a splica e clientenan di FAVI kico ta motivacion, pakico ta importante, y con pa pone nan dilanti metanan claro.

   E participantenan a haya e tayer hopi interesante, y a keda satisfecho cu ne, pero Faridi a keda hopi impresiona di mira con positivo, interactivo y cuanto potencial nan tin, cu nan ta un hopi bon ehemplo pa hopi otro hende. El a gradici FAVI su directiva pa a ricibi’e cu hopi cariño y confianza cu a resulta den un tayer hopi exitoso.

   Potretnan ta cortesia di Fundacion FAVI.