ORANJESTAD (AAN): E compania Setar NV pa hopi aña tabata tin su proyecto di ‘Back to School’ pa yuda nos muchanan cu tas di scol y material pa cuminsa e aña escolar nobo.
E aña aki Setar a enfoca su proyecto di ‘Back to School’ cu otro meta pa yuda Fundacion Ban Uni Man Pa Cria Nos Muchanan cu ta provee nos muchanan di menos recurso cu desayuno na scol.
Un programa cu a cuminsa na e aña escolar 2001/2002, ofreciendo 138 mucha un desayuno, esta un sandwich y un juice of lechi, tur dia na scol. Actualmente, e fundacion ta yuda mas cu 800 mucha na scolnan rond nos isla incluyendo muchanan di traimerdia.
Como e compania nacional di telecomunicacion, Setar ta orguyoso di por aporta cu 15.000 Florin na e fundacion pa nan por sigui cu nan bunita meta di provee nos muchanan cu desayuno tur dia na scol, cu ta esencial pa nan crecemento y desaroyo.
