ORANJESTAD (AAN): Pa celebra e prome luna di su reinado como Miss Teen Universe International 2025, Guizza Maria Steenvoorde a
hiba un bishita llena di gratitud na un hende cu a yuda e sinti mas confia den su mes: Edwina Croes.
Edwina Croes, ex-Miss Aruba y Reina di Carnaval, tin un trayecto largo den e industria di bunitesa y cultura di Caribe. E tabata propietaria di su propio salon den Aruba Caribbean Hotel y tabata e estilista oficial di Beatrix, Reina di Hulanda durante su bishitanan na Aruba. Edwina tambe ta conoci como un di e promotor mas activo di talento local riba e red social, semper motivando tur hoben di su pais.
"Señora Edwina ta un persona cu semper ta para fuerte den momentonan difícil. E ta un ehempel di pasenshi, pasion y amor pa su comunidad, algo cu ta inspira mi masha hopi," segun Guizza Maria.
Durante e bishita, Guizza Maria a entrega un ramito di flor y a regala Edwina un makeover completo di The Salon Aruba — un gesto simbolico di aprecio y di su admiracion.
Guizza Maria tin como meta pa sigui trece dilanti reconocimento na muhernan balente y resiliente den nos comunidad den forma di agradicimento ya cu nan ta e ehempel silencioso pero poderoso di e mihor cu Aruba ta posee.
E momento aki ta un refleho di e balornan cu Guizza Maria ta trece como Miss Teen Universe International: gratitud, inspiracion y compasion. Durante su reinado, lo e sigui lanta voz pa muhernan cu ta sirbi di inspiracion pa nos tur.
{gallery}Guizza Maria Steenvoorde, Miss Teen Universe International 2025 a honra un heroina personal riba Dia di Mama{/gallery}
