CMB y CEDE ARUBA ta uni forsa pa Non-Profit Governance & Leadership Conference 2025

ORANJESTAD (AAN):  Caribbean Mercantile Bank ta uni su mes na CEDE ARUBA como e main sponsor pa un NGO Academy Conference cu lo tuma luga na september 2025.

E iniciativa aki lo tin un inversion inicial di Afl. 42,000.00 y tin como meta pa fortalece e capacidad organisatorio di fundacionnan y organisacionnan den nos comunidad. E conferencia aki lo concentra riba fundacionnan chikito y mediano na Aruba, pa duna nan e hermentnan, conocemento y red necesario pa logra un organisacion eficiente y cu impacto mas sostenibel na fabor di nos comunidad.

E conferencia lo wordo organiza pa CEDE ARUBA den colaboracion cu Aruba Institute for Good Governance & Leadership (GG&L) di Universidad di Aruba. Durante e conferencia, lo inclui charlannan, workshops y panelnan di discusion. Tambe oradornan local y internacional lo ta parti di e programa, cu lo comparti nan experencia y best practices den e area di governance, liderazgo y maneho sostenibel di organisacionnan.

Aparte di e conferencia, CEDE ARUBA y Universidad di Aruba lo lansa e “NGO Academy”, pa sigui apoya e organisacionnan despues di e evento. E NGO Academy lo ofrece workshops, curso y otro tipo di formacion cu ta enfoca riba capacidad y autosostenibilidad di organisacionnan cu ta traha na bienestar di nos comunidad.

CMB ta kere firmemente cu ta importante pa organisacionnan comprende e balor di transparencia y integridad di tin un directiva y ekipo cu ta funciona optimalmente. Esaki no solamente ta beneficia e organisacion mes, pero tambe ta yuda facilita e proceso di diligencia pa CMB. Esaki por ta sea un cliente nobo of pa otro tipo di peticion pa sosten financiero y colaboracion.

CMB ta sumamente orguyoso di por forma parte di e desaroyo importante aki pa nos isla. Tambe CMB ta kere den e poder di “Good Governance” y ta compromete na yuda forma organisacionnan cu ta traha pa mehora calidad di bida na Aruba.

Den e lunanan venidero CEDE ARUBA y CMB, hunto cu Universidad di Aruba, lo invita fundacionnan y organisacionnan pa tuma parti den e conferencia aki y pa probecha di e oportunidad di crecimiento y colaboracion cu e NGO Academy lo brinda.