Clyde Harms ta reflexiona riba un bida extraordinario di servicio y gratitud

Clyde Harms, “E Mucha di Lagoen”, ta celebra su 95 Aña

Skirbi pa Johnny Croes

11 di juni 2026

Dia 1 di juni 2026, Clyde Harms a cumpli 95 aña den compania di su famia y amistadnan na e cas situa na Jupiterstraat caminda el a biba pa hopi aña. Pa mayoria di hende, yega na un edad asina bunita ta un momento pa mira bek riba bida. Pa Sr. Harms, ta un oportunidad pa reflexiona riba casi un siglo yen di experencianan extraordinario, logro personal y servicio na e comunidad di Aruba. 

Sr. Harms, “E Mucha di Lagoen,” a biba durante algun di e cambionan mas significante den historia di Aruba. Naci na 1931, el a mira Aruba transforma for di un colonia chikito bou di e administracion colonial colectivo di Corsou pa despues bira e pais autonomo cu nos conoce awe. 

Ora cu mi a sinta combersa cune recientemente, su prome pensamento no tabata ariba su logronan, sino riba gratitud. 

“Ora mi mira bek, mi curason ta yen di gratitud pa tur e experencianan, reto y bendicionnan cu mi a topa riba e caminda di bida.” 

Su recuerdonan ta bay bek na un Aruba hopi diferente di e isla cu nos conoce awe. E ta corda un tempo cu solamente algun centenares di votadornan tabata eligi representantenan pa e Conseho Colonial, Hulandes tabata e idioma principal na scol y Papiamento no tabata permiți durante scol. 

Sr. Harms a cuminsa su educacion na e kleuterschool catolico na Dominicanessenweg prome cu el a sigui su estudio na Julianaschool. Como studiante sobresaliente, el a gradua cu su diploma MULO na 1947 sin nunca a keda sinta. E mesun aña ey, el a bay Merca pa studia na Rutgers Preparatory School na New Jersey como preparacion pa drenta universidad. 

Su prome aña den exterior no tabata facil. Poco despues di su yegada, el a haya bruela y despues cacheton, loke a oblig’e pasa algun siman den aislamento. A pesar di a perde un cantidad considerabel di les, el a gradua entre e miho studiantenan di su klas. 

Despues cu el a cuminsa studia na Rutgers University, circunstancianan financiero a pon’e den un posicion dificil. Un compania cu a priminti pa paga su estudio di ingenieria a retira su apoyo. Su tata a haci sacrificionan grandi pa sigui financia su educacion, pero despues di un aña, Sr. Harms a regresa Aruba pa drenta den mundo laboral. 

En bes di mira esaki como un fracaso, el a usa e experiencia como motivacion. Mientras cu e tabata traha, e tabata sigui studia anochi y asina a completa varios cursonan profesional. Eventualmente, su perseverancia a duna resultado. Na 1961, como esposo y tata di tres yiu, el a inscribi na University of Kansas. 

Menos cu tres aña despues, el a gradua summa cum laude, terminando como e miho studiante di su klas. 

Esaki a bira e fundeshi di un carera internacional cu a hib’e na diferente partinan di mundo. 

Trahando na Lago y despues na Exxon, Sr. Harms a bishita refinerianan, plantanan kimico y oficinanan na Merca, Europa, Medio Oriente y Noord Africa. Su carera a pon’e memey di eventonan historico cu hopi hende solamente ta lesa for di bukinan. 

Mientras cu e tabata na Caracas, el a presencia e derocamento di Presidente Marcos Pérez Jiménez na 1958. Mas despues, mientras cu e tabata traha na Libya, el a mira di cerca e golpi di estado cu a pone Muammar Gaddafi na poder na 1969. Durante e conflictonan den Medio Oriente, manera e Guera di Seis Dia y e Guera di Yom Kippur, e y su famia a biba periodonan di incertidumbre y preocupacion. 

Su bida profesional tambe a coincidi cu e nacemento di e era moderno di computernan. Na final di e añanan cincuenta, Sr. Harms tabata traha cu e IBM 650 na Lago, hayando experiencianan cu tecnologia cu tabata revolucionario pa e tempo ey. 

Sin embargo, su bida nunca a trata solamente di trabou. 

For di mucha, Sr. Harms tabata un deportista activo. El a hunga baseball, basketball, korfbal, tennis, golf y landamento. Como adolescente, el a participa na e prestigioso Penn Relays na Philadelphia. El a representa Aruba tambe den baseball y basketball y a sigui activo fisicamente te na un edad avansa. 

Prome cu el a cumpli 80 aña, el a participa den eventonan deportivo, demostrando e mesun disciplina y perseverancia cu a caracterisa su estudio y carera profesional. 

Un di su contribucionnan hopi importante, aparte di un gran deportista, tabata crea oportunidadnan pa otro hendenan. 

Na 1956, Sr. Harms a introduci Little League Baseball na Aruba, yudando generacionnan di muchanan desaroya no solamente como atleta, pero tambe como persona. Hopi a haya beca pa studia den exterior, mientras cu otro a logra careranan profesional den deporte. Entre nan ta Xander Bogaerts, hungador estelar den Major League Baseball. 

Educacion tabata un otro parti di su pasionnan. Na 1978, el a funda Aruba Scholarship Foundation (ASF), un organisacion cu a yuda mas cu 300 hoben Arubiano sigui estudionan universitario den exterior. Durante mas cu 25 aña, el a fungi como presidente di ASF, dedicando su tempo y energia pa crea oportunidadnan pa futuro di Aruba. 

Su contribucionnan na comunidad a wordo reconoci na diferente forma. Na 2003, el a wordo condecora como “Ridder in de Orde van Oranje-Nassau”. Ademas, el a ricibi numeroso reconocimento relaciona cu deporte, educacion, cultura y servicio comunitario. 

Sr. Harms tambe ta un escritor y historiado respeta. Cu su bukinan y articulonan tocante historia di deporte na Aruba, specialmente baseball, el a contribui pa preserva parti importante di nos herencia cultural. 

Su involucracion den bida cultural di Aruba a bay mas aya di deporte. For di 2015 te 2019, el a sirbi como tesorero di e fundacion, “Nuevo Mundo Festival and Academy” y posteriormente a wordo nombra Presidente Honorario. Su apoyo na musica, educacion y cultura a gana respet den diferente sectornan di sociedad. 

A pesar di tur su logronan, Sr. Harms ta papia cu masha emocion tocante personanan cu a compañ’e riba e caminda di bida. 

E ta recorda cu hopi cariño su difunto esposa, Beatriz Lopez-Henriquez, cu kende el a forma un famia y a comparti hopi añanan di felicidad. Despues di su fayecimento, el a haya compania y apoyo den Sra. Milagro, kende e ta atribui como un bendicion special den su añanan posterior. 

Na 2014, na edad di 83 aña, Sr. Harms a haci un “open-heart surgery”. Caracteristicamente, el a enfrenta e reto cu hopi balor y determinacion y a sigui disfruta di un bida activo despues di a recupera. 

Awe, na e edad bunita di 95 aña, su mente ta cla y su memoria ta impresionante. Ora cu e mira bek ariba casi un siglo di bida, su curason ta yen di gratitud pa e oportunidadnan cu el a ricibi, e lesnan cu el a siña y e personanan cu a influencia su bida. 

“Mi ta gradici Dios cu a bendiciona mi cu un bida largo y bon di salud.” 

Ora nos combersacion tabata yegando na su final, mi a puntr’e kico e ta spera den futuro. 

Cu un sonrisa, el a contesta: 

“Hunto cu Milagro, mi tin plan di pa yega 100 aña.”  

Un Nota Personal 

Pa mi, e entrevista aki tabata mas cu un simple combersacion cu un di e ciudadanonan mas respeta di Aruba. Esaki tabata un oportunidad pa honra y gradici un mentor. 

Mi a conoce Clyde durante mi involucracion cu “Aruba Symphony Festival”, na unda nos a traha hunto pa promove musica clasico y educacion musical na Aruba. Clyde semper a kere cu musica tin e poder pa cambia bida y habri portanan nobo pa hobennan. Su vision tabata bay mucho mas leu cu presenta conciertonan; e tabata mira musica como un parti esencial di educacion y desaroyo personal. 

Trahando hunto cune a inspira mi pa pensa mas profundamente tocante con nos por haci musica accesibel pa cada mucha na Aruba. E combersacionnan cu nos a comparti, hunto cu e experencia di organisa Aruba Symphony Festival, a contribui na e idea cu finalmente a conduci na e creacion di “LeerOrkest Aruba”. 

Hopi hende conoce Clyde como un lider comunitario, pionero den deporte, historiado y educador. Ami tabata tin e privilegio di conoce como un mentor y tambe como un amigo personal, kende su sabiduria, curashamento y kere den e potencial di nos hubentud, ta sigui inspira mi trabou como educador te cu awe. 

Mientras Aruba ta celebra Clyde su cumpleaños number 95, ami ta uni mi mes cu tur esnan cu nan bida a wordo enrikece door di su guia, amistad y ehempel.