Illona Henriquez, boluntario:
ORANJESTAD (AAN)-- Ilona Henriquez, Boluntario na Animal Welfare Alliance Aruba, a sigui splica den entrevista cu Matutino DIARIO, cu e problema mas grandi na Aruba ta, descuido di e animalnan.
“Animalnan cu carpata, hopi flaco, cu sarna, y cosnan asina por wak hopi. Hopi biaha tin hende tambe cu kier cacho cu pushi, nan kier nan bon, ta duna un par di pushi cuminda, vooral hendenan pensionado, pero si e animalnan haya sarna nan ta haya mas y mas, y e persona ta biba di pensioen y no tin hopi placa y e situacion ta bay for di man. Esnan ta e grupo grandi cu ta pidi ayudo, nos ta purba trek mas hopi posibel, y steriliza e animalnan, pa despues e problema bira mas y mas grandi. Nan tin un pushi cu ta haya cinco yiu y e cinco yiunan ta haya cinco yiu, y asina ta bira un piramide”, señora Henriquez a relata.
El a agrega cu nan ta enfoca hopi riba e personanan asina, cu nan kier y tin bon curazon pa bestia, pero e problema t’asina grandi cu no por anda cu ne mas. No por bisa cu e ta maltrato pero ta algo cu ta bay for di man. “Nos ta traha cu diferente team: team di Mexico cu hunto cu team di Merca. E teamnan di Merca nos tin un cooperacion fiho cu nan, tin cu a bin cinco pa seis biaha caba, tras di otro. Nan conoce e situacion local hopi bon awo, y nan tin hopi experiencia den opera bestianan di caya. Nan ta enfoca hopi riba esey y nan sa con pa haci campaña grandi, grandi. Asina nan ta traha pues, nan ta hopi bon den esey. Nos ta hopi contento di traha cu nan tambe”, señora Ilona Henriquez a señala.
El a agrega cu claramente, personanan cu tin mascota y kier steriliza nan, mas cu bon bini y e servicio ta gratis. Pues, inscribi.
