Clyde Harms a lansa su buki 'E baul di Clyde' rico na historia y cultura  

E ta contene mas cu 100 articulo encuanto Aruba

ORANJESTAD (AAN): Diahuebs anochi na Impact Hub a tuma luga e lansamento di e buki ' E baul di Clyde' cu ta contene un compilacion di mas cu 100 articulo y storia cu e reconocido Sr. Clyde Harms a skirbi y publica durante transcurso di añanan den corantnan di Aruba, entre nan DIARIO.

   Harms a dedica hopi tempo pa skirbi riba historia y cultura di Aruba, tambe storianan riba diferente suceso interesante.

   Den presencia di Prome Minister Mike Eman, su señora esposa Doina Eman; casa di Clyde, Señora Milagro; Sr. Alberto Perret-Gentil, kende a financia e publicacion di e buki; Señora Joyce Pereira di Fundacion Lanta Papiamento y demas invitadonan, Clyde Harms a lansa e bunita y educativo buki aki, cu sigur lo bira un buki interesante pa e actual y futuro generacionnan por siña mas di Aruba.