Club Kibrahacha a cera e periodo aki cu un gran fiesta dunando e grandinan loke nan merece

Club Kibrahacha a cera e periodo aki cu un gran fiesta dunando e grandinan loke nan merece

Coordinador di Actividad Lucia Hoek:

ORANJESTAD (AAN) — Lucia Hoek, Coordinador di Actividad di Club Kibrahacha, den entrevista cu DIARIO a referi na e clausura di nan actividadnan, pa e temporada aki di vacacion grandi.

El a bisa cu ta un satisfaccion di wak con e boluntarionan a prepara e festividad aki, dunando e grandinan loke nan merece den e clausura aki. Club Kibrahacha lo habri bek dia 18 di Augustus. Dialuna 21 lo cuminza cu un “summer camp” pa un grupo chikito, debi cu e chofernan ta bay cu vacacion anto no tin bus, y pa bin na e actividad aki mester tin transportacion propio.

Lucia ta considera cu aunke e ta un grupo chikito nan ta pasa hopi bon, ta bay diferente caminda, y na su opinion e camp aki ta e miho actividad di henter aña.

Tambe como parti di e festividad di clausura tabata tin nan loteria y Lucia Hoek a gradici tur esnan cu a coopera cumprando un ticket, nan a yega na e meta cu tabata tin, y nan a keda super feliz, señora Hoek a expresa.

Señora Hoek no a keda sin expresa palabranan di gratitud pa señor Matos cu a laga su cargo di director di Kibrahacha pa bay biba na Hulanda, hunto cu su famia, pa asumi un reto nobo. Esaki a crea un sentimento mixto, Hoek a bisa, y di parti di e miembronan y tur boluntario nan a desea señor Jeffrey Matos tur sorto di exito den su reto nobo. Nan ta spera cu lo haya un bon persona pa reemplaza señor Matos.

Señora Lucia Hoek a expresa cu nan tin cu bay traha hopi duro pa prepara pa e siguiente aña di actividad, y cu ora nan haya un director nobo tin cu bay papia con pa hinca e programanan den otro.

El a agrega cu den tur e actividadnan cu nan a organiza e ultimo dos aña y mey, e dia aki tabata tin e maximo cantidad di miembro presente, y 25 hende riba pia cu a registra. Kiermen por mira cu e club a crece y mester bay traha duro riba esaki.

“Y nos kier sigui duna e bon servicio manera semper. Naturalmente, nos tin un bus na caminda y nos ta contento pa nos por sigui duna e tempo pa nos grandinan por yega cerca nos”, Lucia Hoek a señala. Finalmente, el a recomenda pa esnan cu kier bira miembro nobo di Club Kibrahacha, bin registra na Augustus proximo, asina nan habri bek for di dia 20 por bin registra.