ORANJESTAD (AAN): Recientemente Super Food Plaza Cares Program a haci entrega di un check na valor di Afl. 30.000 na Stichting Ambiente Feliz.
E check a ser entrega pa store manager di Super Food Plaza, Sr. Johan Klein y a keda ricibi pa e directora Sra. Althea Schmidt hunto cu mas colega di Ambiente Feliz.
Stichting Ambiente Feliz y Super Food Plaza Cares Program ta gradici e clientenan di Super Food di curazon pa nan donacion. Ambiente Feliz ta existi desde 1986 y ta un cas pa personanan cu limitacion mental. Nan ta brinda cuido y guia 24 ora pa dia na nan clientenan.
Recientemente Ambiente Feliz a habri un segundo cas, situa na San Nicolas. Aki nan por acomoda clientenan cu tin multiple limitacion y cu ta rekeri un cuido mas intensivo. Pa motibo di budget limita, e fundacion no por a logra yena tur e necesidadnan di nan clientenan. Awor, cu e donacion aki lo por logra mas, incluyendo cumpli cu cierto necesidadnan nutricional di nan clientenan cu ta sufri di diabetes of otro malesanan cronico.
Clientenan cu haci un donacion di Afl. 1.75 of mas por participa den e campanja di Give & Win di e Super Food Plaza Cares Program. E ganadornan di luna di September a resulta:
Marlene Lacle – gift card Afl. 1.000
Shonno Maduro – gift card Afl. 750
Esther Wijnands – gift card Afl. 500
Sharon Luttje – gift card Afl. 250
Iracema de Fernow – gift card Afl. 100
Pa participa den e campaña aki, simplemente haci un donacion di Afl. 1.75 of mas na cualkier caha di Super Food Plaza y deposita bo recibo original cu nomber y number di telefoon ariba dje den e tombola. Tur prome dia di luna ta saca 5 feliz ganador. Premionan ta patrocina pa Super Food y tur donacion ricibi ta bay bek pa 100% na comunidad. Fondonan di SFPCP ta ser maneha pa CEDE Aruba.
