Clausura di e campaña di firma 'Say Yes to Secrets'

ORANJESTAD (AAN):   Error de Freitas, Presidente di San Nicolas Business Association (SNBA)

a duna un declaracion durante e clausura di e campaña di firma 'Say Yes to Secrets' cual a tuma lugar na San Nicola durante e weekend cu a pasa.  

            El a laga sa cu e colecta di firma ta bayendo bon, pero kier motiva tur ciudadano. A haci tur posibel pa pueblo di Aruba y San Nicolas, pero mas importante tabata e firma pasobra locual Secrets Hotel ta nifica ta masha grandi mes.

            Ta papiando cu den nan prome 600 camber lo tin un "spin-off'" di 30 miyon florin directamente den e economia di pariba, awor corda den e resto di e isla, a expresa.

            De Frietas a sigui bisa cu ora cu e hotel yega na e di tres aña, nan ta bay ta na 62 miyon. Ta papiando di un compania cu Hyatt ta bay maneha. No tin niun manera cu e cos aki no ta bay ta un exito, "pero nos tin cu kere y e presion tin cu baha for di esaki", a expresa.

            Tin cu habri e caminda pa e hotel aki yega y establece pa asina mira un economia pa San Nicolas. E no ta bay ta e unico economia, pero e ta esun mas facil pa nos bay cu ne. Y ken mas experencia den turismo cu pariba di brug. Mayoria di hende pariba di brug a traha den hotelnan.

            Pesey ta encurasha hende pa firma. Kier yega na 15 mil firma pa asina por mira cu e districto aki merece su hotel.

            Hopi hende ta kere cu e firma no kiermen nada, cu e firma ta un influencer. E firmanan aki, a enfatisa, nan ta bay hibe corte, gobernador, gobierno, parlamento pasobra e asunto aki mester wordo scucha. Tur e presion aki no ta necesario y no mester ta asina duro pa San Nicolas, a bisa.