Tisa Lasorte CEO di AHATA:
*Turista ta cuminsa gasta un tiki menos
ORANJESTAD (AAN): Tisa Lasorte, CEO di Aruba Hotels and Tourism Association (AHATA) a indica cu mercado turistico na Aruba ta pasando den un luna caminda tin turismo ta baha un tiki. Esaki ta pone cu ta bay bek na e patronchinan anterior. Turismo ta baha un tiki na september.
El a bisa cu despues di e pandemia tabata tin un trayectoria hopi bon. Aruba a recupera hopi lihe y tabata mira cu e personanan cu tabata biaha tabata gasta mas. Consecuentemente e prijs di hotel por a bira mas halto. Gastonan di operacion na Aruba tambe a bira mas halto.
Lasorte a agrega cu den e temporada aki por a hisa prijs un tiki pa yuda cu e gastonan extra ya cu e demanda tabata halto.
Den e ultimo tempo a mira cu e demanda ta normalisando y esey kiermen cu no tin mes hopi demanda cu tabata tin e ultimo añanan despues di pandemia. Tambe e patronchi di gasto ta cambiando. Awor ta cuminsa tende storianan di diferente operador chikito of un tienda cu ta bisa cu nan ta cuminsa mira cu e entrada ta bahando.
Esaki AHATA ta compara cu e datonan cu ta haya di e hotelnan, cu ta duna e prijsnan di camber, cu e luna di augustus ta prome biaha cu e RevPAR (revenue per available room) tabata menos compara cu aña pasa, a indica.
Awor e demanda ta cambiando un tiki y e turista ta cuminsa gasta un tiki menos, a señala.
Tisa Lasorte a indica cu normal pa Aruba tambe ta basta bon, Ora cu ta bisa cu e situacion ta normalisando no kiermen cu cos ta birando malo, pero cu ta mirando un cambio.
