Hopi persona ta tirando culpa riba control di DVG - ORANJESTAD (AAN): Den fin di siman cu a pasa, por a nota cuanto reclamo tabatin di turistanan cu a keha
cu rijnan na Aeropuerto di Aruba pa bay check-in y drenta via Inmigracion tabata hopi largo mes. Mesun cos a ser bisa, pa pasaheronan cu a caba di baha di avion.
E informacionnan aki a yega tambe cerca trahadornan na Aeropuerto, incluyendo esnan cu ta labora na Departamentonan di Inmigracion, y Aduana. Nan sa cu enberdad tabatin rijnan masha largo mes y pega.
No por djis yega y apunta dede riba tur hende! A ser splica, cu e Departamentonan di Gobierno cu ta labora na Aeropuerto, diariamente ta haci tur lo posible pa complace e turista of e usuario di Airport y tambe brinda e servicio di calidad.
Comentario cu DIARIO a ricibi di algun persona trahando den Inmigracion y tambe Aduana, ta bisa cu ta e medidanan pa cu protocol di Covid-19 ta e causante.
Nan ta opina, cu loke ta strobando y ocasiona e “pegamento” di pasahero eyriba ta e personal di DVG cu ta haciendo su procedimento pa mira ken tin vacuna of no, y si nan tin e papeleo y resultado negativo di e PCR-testnan necesario.
Esaki ta pone cu ora DVG su sala pega abao, nan ta manda stop e fluho di pasahero parti ariba ocasionando un desastre y disgusto pa cu e viahero cu a caba yega cansa di viahe.
Nan ta kere cu mester por bin cu e solucion caminda lo por move e pasaheronan aki cu ta yega for di e area di entrada, y pone nan haci test na otro caminda pasobra igual nan lo drenta.
Otro sugerencia ta cu tambe esnan cu ta bay controla nan 48 of 24 ora prome na un control center cu no ta na Airport, pa asina nan no stroba e fluho.
Trahadornan di gobierno ta lamenta cu hendenan a tuma e situacion di caos na Aeropuerto di fin di siman, y purba pusha e culpa riba esnan di Inmigracion y Aduana.
E situacion ta urgente pa Gobierno tuma un decision rapidamente, hasta ayera caba! Mester yega e partners nan hunto na mesa y bin cu un plan di maneho temporal pa e situacion aki, y evita un ripiticion pa e fin di siman venidero.
Hecho ta cu hopi hende na Merca porfin a busca forma pa bay tuma vakantie, y esey ta pone cu pa weekend venidero lo bay tin mas pasahero un biaha mas ta yega of saliendo di Aruba.
Ademas, ta parce cu ultimo dianan, tanto Aruba Tourism Authority y tambe AAA NV a lubida completamente nan plan di “Happy Flow”. E ta no-existente den fin di siman.
Potret aki cortesia Facebook.
