Hulanda a bay contra tur regla di bon empresario ora Covid-19 a pone contra muraya - *Trabou di Gabinete Wever-Croes a haci cu Aruba por a sikiera negocia prestamo sin interes - *E nucleo di Coho ta keda cu Aruba for di 2015 ta den estado di bancarota cu supervision
ORANJESTAD(AAN)—Nos a sigui e prome reunion gracioso ora fraccion di AVP a tene un walk out, pa protesta pasobra Mike Eman y su back to back reemplasante Wyatt-Ras no a firma e lista di presencia cu tur otro miembro di nan partido si a firma.
Uzo a wordo haci di e hecho cu e Presidente a habri reunion tempran y aparentemente Wyatt-Ras y Eman no a wordo informa dor di nan coleganan di AVP unda nan por a haya e “presentielijst” y inscribi nan mes pa por papia riba e topico.
En todo caso tabata tin un walk out ora mester a trata e presupuesto, cu ta yiu mayor di e herencia di Mike Eman na 2017.
Sumamente gracioso, sigur despues di e prome reunion ora a falsifica voto pa dicidi kende ta bira Presidente di Parlamento y Wyatt-Ras no a traha un proces verbaal riba e hecho castigabel aki.
Siman pasa tabata e acuerdo cu Aruba a alcansa na 2020 cu Gobierno di Reino pa haya yudansa na momento cu e coronavirus nobo a cera porta di economia di Aruba.
Dos factor abiertamente a bini dilanti den henter Reino.
Na prome lugar, Prome Ministro Wever-Croes no a permiti Hulanda pusha su Gobierno contra muraya pero a sabi di regla un prestamo local cu a permiti Aruba sigui cana un rato y sigui negocia cu Hulanda.
Na segundo y sigur un lugar importante, loke Hulanda mes a admiti den Reino cu ta e progreso cu Aruba a haci ariba tereno financiero di parti di Prome Ministro Wever-Croes y su Gabinete, cu a haya un lugar special y historico den e negociacionnan pa asistencia Hulandes pa Covid-19 pero tambe pa paga debenan cu a wordo hereda di Gobierno Mike Eman.
E problema pa Hulanda a duna Aruba un prestamo sin interes, si a scucha tur loke Hulanda a trece dilanti, no tabata e hecho Aruba a wordo afecta dor di Covid-19 pero e hecho cu durante Gobierno Mike Eman, Hulanda mester a interveni, introduci medidanan di supervision financiero.
Kico mester a spera? Cu Hulanda lo a entrega e placa sin mas? Un banco cu wordo acerca pa un prestamo, ta duna un prestamo na un persona cu kier sigui hunga roulette den casino cu placa di Pueblo?
Esaki tabata e acusacion directo di Raymond Knops den su confrontacion cu Aruba pa asistencia y e exigencianan di Coho. Knops a bisa cu Aruba tabata den estado di bancarota.
Aruba mescos cu henter mundo ta pasa den un tempo sumamente dificil, Sin Hulanda, Aruba lo no a sobrevivi for di 2015 hasta si nunca Covid-19 a bati na porta. Si esaki no tabata e caso, Aruba lo no tabata bou supervision ora e mester a bolbe bay bati na porta di Hulanda na 2020!
Prome Ministro Wever-Croes mester a acepta Coho pasobra e bom di Mike Eman a rementa den su man!
