ORANJESTAD (AAN): Ata un bon conseho pa bo tuma nota di dje, pa bo check e señalnan pa sa si bo mascota ta sinti alegre na bo cas of no.
Pa bo brinda bienestar na un mascota, ta un di e principal responsabilidad di personanan cu tin cacho of pushi na nan cas, pues bo no ta djis duna nan un dak y cuminda, sino tambe tur lo necesario pa nan ta feliz.
Aunke tin biaha e no ta resulta asina facil pa haya sa si di berdad nan ta feliz, toch tin cierto postura of comportacion cu ta permiti pa duna cuenta cu bo amigo fiel ta feliz cu bo.
Den caso di cachonan, e website ‘ExpertoAnimal’ cu ta un comunidad forma pa veterinario, dog-trainers, expertonan di ethologia, y asistentenan tecnico di veterinario, ta insisti cu e cinco pasonan aki por yudabo haya sa si acaso bo mascota ta feliz y tin confianza den bo:
(1) E ta invitabo pa hunga: E postura aki e ta dunabo ora cu e animal ta hisa e parti patras di su curpa, ta dobla su patanan dilanti y ta keda mirabo fiho, pa despues sali core bay hunga. Si e agrega algun salto of movimento rapido, esey por ta un señal claro cu e cacho ta feliz.
(2) E cacho ta apoyabo: Sigur bo a pasa den situacion cu bo ta sinta of drumi, y diripiente bo cacho ta yega pa pone su patanan of su cabez na bo curpa. Esaki ta señal di felicidad y confianza.
(3) Bo cacho ta lora riba yerba: Si boso ta dal un paseo y bo mascota ta lora bay riba su lomba, y despues ta frega su lomba riba e yerba pa haya bo atencion, y despues ta para bek riba su patanan ta halando rosea, esey nifica cu e ta gozando di e momento ey masha hopi mes y ta feliz cu bo ta hunto cune.
(4) Ta lagabo mishi cu su barica: Ora cu un cacho bay drumi riba su lomba y ta boca ariba, ta demostra cu e ta contento cu esnan rond di dje. E ta demostra confianza y e ta hacie pasobra su bienestar ta excelente, segun e website.
(5) E ta stop mey-mey di wega: Ora e ta diverti cu otro animal y diripiente ta haci un pausa y ta hap pa rosea, tin ningun duda cu e ta pasando den un di e mihor momentonan di su dia, segun ExpertoAnimal.
PA PUSHINAN:
E señalnan pa pushi mas cu claro ta diferente cu esnan di cacho. Si tin un pushi chikito na bo cas, tuma nota di e cinco señalnan aki cu e revista di e compania di cuminda aleman, Zooplus a indica.
(1) Core rond hopi spierto: “Si bo kerido pushi diripiente ta core rond di hardin, cas, of piso pa ningun motibo alguno,” esaki ta un bon señal di alegria, segun e revista. “Pushinan ta expresa nan deseo incontrolable di kier disfruta di bisa,” nan a indica.
(2) E ta cana cu rabo hisa: Si bo mascota tin su rabo hisa, y e punta un poco bira y ta frega su curpa contra bo pianan, “ta hopi claro cu e ta satisfecho,” segun Zooplus.
(3) E ta bin cerca bo pa bo pasa man den su lananan: E ta un señal cu bo tin un pushi feliz ora cu e subi sofa pa asina bo mim’e of braz’e. Of ora cu e ta subi riba e sofa ta miauw mientras bo ta trahando. Si e ta haci esaki, sintibo trankil, pasobra bo pushi ta feliz.
(4) Si e bin keda purr cerca bo: E sonido di ‘purr’ cu e ta produci ora e ta cerca di bo, ta un señal cu e ta manda tambe cu e ta hopi feliz di ta cerca di bo asina.
(5) E ta frega su nanishi na bo curpa: E comportamento aki ta un señal cu bo pushi ta sinti su mes asina contento di bo compania, cu e kier yena bo curpa cu su holor. Pues e ta marcando abo como su teritorio.
