ORANJESTAD (AAN): E aerolinea Latam Colombia a informa via un boletin, cu debi na e aumento explosivo di casonan di Covid-19 meymey di nan miembronan di tripulacion, nan a haya nan obliga Diahuebs 6 di Januari 2022 di cancela siete vuelo.
E aerolinea a admiti cu e cantidad di trahador contagia, a limita nan di haci algun vuelo pasobra simplemente no tin personal di cabina pa haci esaki. Nan ta bisa cu nan empleadonan cu Covid-19 a impacta como 3.6% di nan operacion.
E vuelonan cu nan a cancela tabata e.o. vuelonan di Bogota pa Cali y vise-versa, vuelo di Bogota pa Cartagena y vise versa, y vuelo di Bogota pa Bucaramanga y vise-versa. Tambe un vuelo di Bogota pa Cali a wordo cancela.
Debi na esaki, Latam Colombia a bisa cu pasaheronan cu a wordo afecta, por pidi nan placa bek sin cu tin di paga multa, of haci cambio di fecha, sin cu tin di paga multa tambe. Por cambia ruta si, pero esaki lo depende di e tarifa.
