Cinco hubilario special a worde honra

ORANJESTAD (AAN): Den fin di siman tabatin un momento di celebracion y reconocemento pa varios empleado cu a cumpli sea 30 of 20 aña di servicio cu MetaCorp.

E celebracion a tuma luga na Balashi Beergarden den presencia di famia, amigo y e ehecutivonan di e compania netamente Arubiano cu mas aña continuo di existencia. Ta trata aki di empleadonan cu ta traha na EcoTech y na APEX.

   Carlos Suarez a cumpli 30 aña di servicio cu APEX, cu antes tabata ATCO Arub. E ta traha den e seccion di garashi. Carlos Suarez  a cumisa traha cu ATCO Aruba desde 1 di juni di aña 1993.

Wendell Bennett a tuma Carlos den servicio como mecanico. Durante su añanan di servicio, Suarez a bira un mecanico specialisa riba diesel y como tal ta masha crucial den mantencion di e ekipo y vehiculonan di e compania.

   Tini Thielman a cuminsa traha na Maduro Travel dia prome di juli 1993. Tini a traha na e diferente branchenan di Maduro Travel y alavez den diferente departamento. Tini a cuminsa na Maduro Travel na e branche na Playa como Sales Clerk, pero despues di un periodo masha cortico a mand’e pa asisti na e branche na San Nicolas. Den su trayectoria laboral Tini a traha tambe durante shete aña na Mariniers Kazerne como un travel agent special pa kazerne so. Un periodo cu e ta recorda cu hopi bon experiencia. Dia prome di januari di aña 2021 a pas’e pa Ecotech como accounting officer unda cu Tini a cuminsa traha den Accounts Receivable y awo ta trahando den e departamento di invoicing.

   Adelaida Carmen Erasmus, na trabao tur conoc’e como Laida. El a cuminsa traha dia 16 di juni di aña 2003 den e funcion di sales. Actualmente Laida ta trahando cu e team di dispatcher na Ecotech Aruba. Laida su coleganan tin un aprecio pa su trabao mirando cu e ta puntual, critico y comprometi.

   Gwendoline Tromp a cuminsa traha dia 2 mei di aña 2003 na Associated Transport Co. (ATCO) como administrative assistant den e departamento di concret y despues a pasa pa e departamento di accounting como invoicing clerk. Na aña 2010 Gwendoline a bay traha cu ATCO Concrete (awor APEX), caminda el a eherce diferente funcion den e departamento di accounting. Aki Gwendoline a traha como invoicing clerk, kas controlle y accounts payable. Na aña 2021 a pasa Gwendoline pa ATCO Aruba/Ecotech unda ta trahando como accounts payable officer. Gwendoline semper a haci su trabao manera debe ser y ta un persona cu semper a coopera y ta yuda te unda cu e por.

   Jairo Dania a cuminsa su trabao cu e famia di Ecotech dia 29 di april di aña 2003. Jairo a cuminsa como helper y durante e añanan el a progresa riba diferente areanan di trabao.

Actualmente Jairo ta e chauffeur responsabel pa ruta di Noord. Team di EcoTech ta contento cu Jairo su trabao. E ta responsabel, critico y leal.

   MetaCorp y e companianan APEX como tambe Ecotech a felicita e trahadonan y gradici nan cu nan aniversario. Un logro di 20 of 30 aniversario sigur ta algo remarcabel y ta refleha e dedicacion y compromiso pa cu nan trabao. E contribucion di cada un durante e añanan sigur a aporta na un un impacto positivo pa e companianan. Gerencia di MetaCorp ta duna danki na cada un un pa e trabao duro y lealtad na e companianan.