Cinco grupo tipico a deleita e publico durante e prome Anochi Tipico organiza pa Biblioteca Nacional

Glenda Zavala-Maduro contento y orguyoso:

ORANJESTAD (AAN) – Manera señora Glenda Zavala-Maduro, Organizador di actividadnan cultural na Biblioteca Nacional, a informa un par di siman pasa, cu BNA lo organiza un anochi tipico pa e publico goza di Aruba su cultura. Asina, Diabierna cu a pasa un exitoso anochi tipico a tuma lugar, cu cinco grupo tipico di Aruba cu a deleita e publico.

            Esaki a sosode hunto cu e Comision Tipico di Aruba, cu señor Fabian Ras. Tabata tin un grupo di baile cu a haci un tremendo presentacion y tambe un cantante di fam Quandt a mustra su talento.

            Señora Zavala a gradici tur cu a yuda organiza e anochi aki, cu ta haci e trabao aki gratuitamente pasobra a yega momento pa pueblo tuma Aruba su cultura, na pecho.

            E dama a subraya cu hopi ta esnan cu ta organiza, pero tin biaha ta poco hende ta bin probecha di goza di Aruba su cultura. Biblioteca Nacional ta un di instancianan cu ta organiza actividadnan cultural, y esaki ta e di tres den aña aki cu BNA a presenta.

            Zavala a informa cu na September lo tin mas actividad cu nan ta yama Luna Cultural, unda tambe nan ta bay tin diferente grupo tipico cu ta bay tuma lugar den e cura di Arubiana Caribiana, unda pueblo por bin y goza un biaha mas di e cultura local.

            Zavala-Maduro a splica con a bin na e idea di organiza actividadnan cultural di Biblioteca Nacional. El a menciona cu e ta pertenece na un grupo tipico encabeza pa Fabian Ras ken ta organiza e asina yama “Fiesta di Caya” den diferente bario, el a puntra Fabian Ras pa nan organiza algo similar, na Biblioteca Nacional.

            El a agrega cu Fabian Ras ta habri, y mesora nan a cuminza planea y nan a presenta e anochi tipico Diabierna anochi. E hecho ta cu hopi biaha e Arubianonan mes no sa ki tipo di instrumentonan e gruponan tipico ta uza, ki tipo di cantica nan ta toca.

            El a comenta cu e mes cu ta hopi den cultura, no tabata sa cu na Aruba tin grupo tipico cu ta toca cu sofonia di boca, viol, acordeon, steel band, pero ta aworaki cu e ta bezig cu grupo di baile y musiconan el a bin haya sa esey, y e ta algo leuk. Y ta bon pa hasta pa e muchanan cu ta lanta awendia sa cu na Aruba tin gruponan tipico cu ta toca cu diferente instrumento.