Parlamentario Gino Goeloe, fraccion FUTURO:
*Cu e sumanan aki ningun hende por biba akinan
ORANJESTAD (AAN): Den entrevista cu Matutino DIARIO, Parlamentario Gino Goeloe, di fraccion Futuro, a confirma cu ocho mil persona pensionado na Aruba, ta haya un pensioen di 600 pa 800 florin pa luna, segun cifranan ta mustra.
Y realidad ta, el a bisa, cu ningun hende na Aruba por sobrevivi cu e suma ey, y esaki ta algo cu mester drecha, y duna e prioridad na e personanan aki, pa drenta un cas di cuido, priva.
“Un cos si mi sa, ta cu ya gobierno caba ta poniendo e hendenan aki drenta un cas priva. Gobierno ta pone e placa, dus e pensioen di 800 florin. Ban bisa, e cas di cuido ta costa 1.800 florin, e resto gobierno ta pone pa e grandi por drenta un cas priva si no tin lugar den SABA. Aworaki, manera nos tur sa, no tin lugar den SABA, pero e casnan priva ta tuma nan temporalmente, wardando pa nan drenta SABA.
Na SABA nan no ta paga nada, pero ora gobierno ta zorg pa e cas di cuido por haya su mil florin pa nan suma nan 1.800 florin. Algun cas ta 1.800 florin pero mayoria awo ta costa mas di dos mil florin, segun mi a compronde”, Goeloe a señala.
Gino Goeloe a subraya cu si nos mehora e cuido na cas, ningun di nos grandinan mester bay cas di cuido, y loke semper el a stress riba dje ta “Laga nos reforza e cuido na cas; laga nos duna Wit Gele Kruis e placa cu e mester pa cuida e hendenan na cas, y e casnan di cuido por haya menos peso riba nan. Y ora ey e pensionadonan cu ta haya 600 of 800 florin di pensioen por drenta e casnan di cuido aki, hopi mas lihe”, Parlamentario Goeloe a señala.
