Nos ta honra e balentia, retonan y speransa di esnan cu e malesa aki
ORANJESTAD (AAN): Cada aña, riba 13 di october, mundo ta para keto pa honra ‘Metastatic Breast Cancer Awareness Day’. Un dia cu ta corta mas profundo cu cintanan y luz ros. Esaki ta un dia pa briya y conscientisa riba cancer di pecho Stage IV. Esaki ta ora cu e cancer a plama mas leu di e pecho pa otro organonan manera weso, higra of pulmon. E ta un dia tambe pa honra e balentia, retonan y speransa di esnan cu tin ‘Metastatic Breast Cancer’ (MBC).
Contrario di e fase inicial, no tin cura ainda pa MBC. Tratamento ta un trayecto hopi largo, pa controla e malesa, suavisa sintoma, y preserva calidad di bida di e pashent. Pero tras di tur diagnostico, ta para un muhe real, un mama, un ruman, un amiga cu ta lucha dia y anochi pa tempo, pa dignidad, y pa comprencion.
Conscientisacion pa MBC ta importante pasobra hopi campaña ta enfoca riba deteccion tempran y sobrevivencia, pero esnan cu tin e malesa avansa ta sigui lucha, nan no a caba cu e biahe, nan ta sigui cana e caminda di recuperacion. Nan no ta sobrevivientenan den remision, nan ta sobrevivientenan den progreso.
Mensahe pa Aruba: Na Aruba, cancer di pecho ta keda un di e malesanan mas comun pa e hendenan muhe. Aunke cu e datanan riba casonan di MBC ta hopi limita, tur famia Arubiano conoce un persona cu e malesa aki a toca nan porta. Ya esaki mes ta un yamada pa mas compacion y accion di henter e comunidad.
Loke pa haci: Pa cuminsa nos por bisti e colornan di MBC of Ilumina edificionan public cu e colornan aki, esta berde, teal y ros como muestra di sosten. Por tuma tempo pa skirbi y conta bo storia real pa mustra cu tras di cada number tin un bida. Nos por sostene fundacionnan local cu ta yuda esnan cu ta pasa door di e malesa aki.
E dia aki, laga nos honra e balentia di esnan cu ta biba cu Metastatic Breast Cancer, y traha pa un futuro caminda ningun hende ta lucha den silencio. Conscientisacion no ta solamente pa keda informa, e ta tambe pa ta preocupa, cuida y sostene.
