ORANJESTAD (AAN): E Comite Nobel Noruego a otorga e premio Nobel di Paz 2025 na e lider Venezolano María Corina Machado.
E premio ta reconoce su “trabao incansabel pa e derechonan democratico di e pueblo Venezolano y su lucha pa logra un transicion husto y pacifico di dictadura pa democracia.”
E comite a enfatisa cu “María Corina Machado ta cumpli cu e tres criterionan estableci den e testament di Alfred Nobel pa e seleccion di un Premio Nobel di Paz. El a uni e oposicion di su pais, nunca no a vacila den su resistencia na e militarisacion di e sociedad Venezolano, y a apoya firmemente un transicion pacifico pa democracia.”
Nan a agrega cu “el a mustra cu e hermentnan di democracia tambe ta hermentnan di paz. E ta encarna e speransa pa un futuro diferente, uno caminda derechonan fundamental di ciudadanonan ta wordo proteha y nan bos ta wordo scucha.”
E comite a remarca cu “como un lider di e movimiento pro-democracia na Venezuela, Machado ta un di e ehempelnan mas extraordinario di curashi civico na Latino America den ultimo temponan,” y a recorda cu “e tabata un figura clave y unificador den un oposicion politico cu anteriormente tabata profundamente dividi, un oposicion cu a haya tereno comun den e demanda di eleccionnan liber y un gobierno representativo.”
E comunicado a recorda cu “Venezuela a evoluciona di un pais relativamente democratico y prospero pa un estado brutal y autoritario, cu un crisis humanitario y economico, represion sistematico di oposicion, fraude electoral, y persecucion legal.”
Prome cu e eleccionnan di 2024, Machado tabata un candidato presidencial, cu a wordo inhabilita pa participa door di e regimen di Maduro. El a dicidi di apoya e representante di otro partido, Edmundo Gonzalez Urrutia. Miles di boluntario a participa como observado di eleccion pa garantisa e transparensia di e eleccionnan, a pesar di e riesgo di acoso, aresto y tortura.
E comite a subraya cu “e esfuersonan di oposicion colectivo, tanto prome como durante e eleccionnan, tabata innovativo y balente, pacifico y democratico,” señalando cu aunke e regimen a nenga di acepta e resultadonan di eleccion, lidernan di oposicion a publica conteo di voto for di e distritonan demostrando nan victoria cu un margen claro.
Nan tambe e a destaca cu “democracia ta un prerekisito pa paz duradero. Sinembargo, nos ta biba den un mundo caminda democracia ta den retroceso, caminda mas y mas regimen autoritario ta reta normanan y ta recuri na violencia.”
E Comite Nobel di Noruega a recorda cu durante henter su historia nan a honra individuo y organisacionnan balente cu ta enfrenta represion y ta demostra cu resistencia pacifico por cambia mundo, y a señala cu Machado “a wordo forsa pa biba scondi y, a pesar di menasanan serio pa su bida, a keda den e pais, inspirando miyones di hende.”
Aña pasa, Machado y Gonzalez Urrutia a wordo condecora cu e premio mas halto di derechonan humano di Union Europeo, e Premio Sakharov.
E Premio Nobel di Paz ta e unico Premio Nobel cu ta wordo otorga na Oslo, Noruega. Cuater di e otro premionan—medicina, fisica, kimica y literatura—ya a wordo anuncia e siman aki den e capital Sueco, Stockholm. E premio Nobel di Economia lo wordo anuncia dialuna.
