Cifranan di esnan cu no a vacuna ta mas cu 3 biaha mas halto

Crisis Team a raporta 61 caso nobo y 302 activo di Covid-19 

ORANJESTAD (AAN): Segun resumen di diaranson, tin un total di 61 caso nobo di COVID-19 cu a keda registra di cual 10 ta turista y 51 ta residente.

E cifranan aki ta representa un 'Positivity rate' bao di e residentenan di 25%. Di e 10 turistanan 6 a test na salida for di Aruba y 4 durante nan estadia riba Aruba.

Cantidad di casonan activo di COVID-19 ta 302 y cantidad di fayecidonan relaciona na COVID-19 ta 109.

Cifranan ta indica un subida continuo di casonan nobo cu un average semanal di 35 caso pa dia y un average di 'positivity rate' semanal di 20% pa dia.

Hospital tin 9 persona interna di cual 2 ta den ICU, 1 ta den ICU como caso activo y 1 ta den ICU como caso inactivo y riba piso general tin 7 persona interna di cual 5 ta caso activo y 2 ya inactivo.

Pa loke ta e 51 casonan nobo bao di residentenan Crisis Team ta informa cu 37 persona no ta vacuna, 4 ta vacuna cu e prome dosis di e vacuna, 9 ta vacuna cu tur dos dosis y 4 a vacuna den periodo di incubacion y a test positivo menos cu 5 dia despues di tuma e prome vacuna.

Cu entrada di e variante Delta ta tuma nota cu e cifranan di esnan vacuna cu 2 dosis cu ta keda infecta cu Covid a aumenta poco, pero no por compara esaki cu e cifranan di esnan cu no a vacuna cu ta mas cu 3 biaha mas halto.