Regreso di Mike den Parlamento ta habri e momento grandi cu nos tabata spera - *Awe pa ley Mike Eman mester controla pago di e raket di debe cu el a pasa pa futuro - *Durante tratamento di presupuesto e mester splica con el a trata Ley di Contabilidad
ORANJESTAD (AAN) — Ley di Contabilidad. Uno di e Leynan mas importante pa Aruba pero cu lamentablemente no ta haya e balor cu e merece.
Ley di Contabilidad ta directamente mara na husticia cu ta wordo haci na un Pueblo, cu ta duna gobernantenan e oportunidad pa gana placa cu Pueblo ta pone den caha di e pais y pa cual segun e Ley di Contabilidad, nan mester tene nan mes na ley.
Pa un gobernante por gasta placa di Pueblo, entre otro e mester tene su mes na e sumanan aproba pa Parlamento cu mester aproba di antemano sumanan cu gobierno kier gasta.
Parlamento tin e derecho di “budget”. Esaki ta nifica cu Parlamento ta dicidi riba entrada y gasta di Gobierno, di fondonan di Pueblo cu Parlamento ta aproba.
Ta hustamente entrada y gasto ta dicidi riba “budget”, placa disponibel di Pueblo, riba cual Parlamento so por dicidi.
Kico Ley di Contabilidad a nifica pa Mike Eman y con el a tene su mes na e ley sagrado aki, ta bini dilanti den tur rapport y den tur loke Mike Eman a uza pa crea un imagen falso di su gobernacion enfrente Pueblo di Aruba.
DIARIO ta reta Mike Eman pa bin bisa cu DIARIO ta practica mentira of cu DIARIO no ta na haltura di loke e ta trece dilanti ora e papia di Ley di Contabilidad.
Mike Eman a bira Prome Ministro cu un promesa cu ta mata e base di Ley di Contabilidad, cu ta exigi un gobernante hiba un maneho financiero na interes di Pueblo y cu no ta crea desaster pa Pueblo.
Mike Eman a priminti Pueblo cu e ta baha BBO y despues deshaci di BBO, cu ta entrada di Aruba.
For di momento cu Mike a haci e promesa aki, Mike a duna prueba cu e ta trapa riba Ley di Contabilidad cu no ta permiti un gobernante deshaci di entrada di Pueblo sin cu e por pone otro entrada na su luga. Mike ni sikiera tabata tin un documento den cual el a prepara e cumplimento di e promesa serio, cu e no por a cumpli tampoco y a laga na mita.
Mike a comete un acto contra Ley di Contabilidad, manera den rapportnan ta bini dilanti y a dal e prome paso pa sink Aruba.
Awe den Parlamento, Mike mester bisa si esaki ta mentira.
Mike a lansa e proyecto di 1.6 Biyon den cual Parlamento cu tabata sostene Mike Eman, a deshaci di su derecho di budget, su deber di controla con Mike Eman tabata gasta placa di Pueblo.
E forma cu Mike a haya probacion pa gasta e placa manera e tabata kier, a deshaci di e deber constitucional di e Miembronan di Parlamento di AVP, cu a duna Mike un fondo di 1.6 Biyon pa e lubida di drecha school rond Aruba pera a gasta e placa pa tram, brug, fietspad, etc. etc. hunto cu Benny Sevinger. Ni Parlamento por controla Mike Eman ni Hulanda.
Mentira nos ta practica Mike Eman? Habri boca bin bisa nos!
Mike Eman a trapa riba Ley di Contabilidad ora sin aprobacion di Parlamento el a mara Aruba na Citgo y a firma e Acuerdo di Citgo cu Nicolas Maduro. Un documento cu a wordo firma cu Nicolas Maduro na forma ilegal pasobra e no tabata tin aprobacion di Parlamento cu pa colmo Mike como dictador a nenga di permiti Parlamento studia y mira hasta ora el a firma e acuerdo.
Ta comprendibel cu Mike Eman tabata tin miedo di atende na reunion di Parlamento siman pasa.
Na e momento cu Mike Eman presenta den Parlamento, oportunidad ta habri pa na nomber di Pueblo di Aruba, representantenan di Aruba puntra Mike con el a logra hinca Aruba den e desaster financiero, cu el a laga como herencia pa Aruba!
Parlamento for di momento cu Mike Eman a bolbe drenta e edificio tin oportunidad pa exigi Mike Eman awe for di oposicion bisa kico el a haci cu Aruba, cu 1.6 Biyon, cu e debe nacional cu el a laga como caha di morto financiero di Aruba atras!
Concenshi di Mike porfin a papia ora el a haya e forma pa no tabata presente pa trata presupuesto di e Aruba cu el a destrui???
