Cifra di natalidad na Aruba di 2023 tabata bastante abao

Prome biaha den 51 aña cu esaki ta sosode

• Apenas 856 baby a nace den e diesdos lunanan
• Tin di lanta un Comision pa discuti e trend aki 

ORANJESTAD (AAN): E rapport nobo conteniendo cifranan, ta mustra un trend cu pa prome biaha den mitar siglo di tempo ta wordo detecta na Aruba.  Hecho ta cu desde cu ta mantene cifra, awor na aña 2023, pa prome biaha den 51 aña di tempo, e isla di Aruba a registra un natalidad asina abao!  Pues e cantidad di baby cu a nace ta notablemente menos compara cu tur e añanan anterior.

   Esaki ta loke Gino Goeloe, kende ta director di Wit Gele Kruis Aruba a confirma na DIARIO.

   E ta referi na e rapport di “Ouder- en Kindzorg” di nan mes, y loke mas ta sobresali di esaki y cu ta referi na henter aña 2023 ta, cu e cifranan di nacemento tabata hopi abao den e diesdos lunanan ey.

   E registro oficial di cantidad di criatura cu a nace na 2023 tabata 856 baby.  Esaki ta algo cu historicamente den 51 aña, por mira cu Aruba a bay atras asina drastico.  Di aña pasa caba WGK Aruba a duna indicacion cu nan ta mira cu e cifra di natalidad ta bahando.  Hecho ta cu desde pandemia di Covid-19 caba, pues na aña 2020 a mira cu e natalidad a baha bao di 1.100 baby, y a registra 1.052 baby.  Pa aña 2022 esaki a baha te na 915 baby.  Pa 2023, el a yega te na e bom di 856 baby.

   Goeloe a indica cu e natalidad abao aki lo por bay afecta economia di Aruba den futuro.  E ta spera cu lo por bay sinta den un comision cu tur partner eyfo, e.o. Oficina Central di Estadistica, Departamento di Asuntonan Economico, y Gobierno pa mira kico ta bay haci.

   Director di WGK Aruba a indica, cu nan a bay compara cu e añanan anterior, y bo ta mira con na 2012 tabatin 1.311 baby cu a nace.  Awor na 2023 ta apenas 856 baby, cu ta un diferencia di 455 baby menos (como 65,3% menos).

   “Pa esey nos ta preocupa,” Goeloe a indica.  “Pesey nos kier bay traha y puntra pa forma un Comision y mira kico nos ta haci.”

   WGK Aruba mientras tanto a tuma nota cu na isla di Curaçao tambe e cifra di natalidad ta hopi abao, y cu na Hulanda tambe e cifranan di nacemento ta abao.  “Eigenlijk ta henter Europa ta riparando cu e cifranan di nacemento ta bahando.”

   Gino Goeloe a indica cu el a mira algun entrevista haci cu hobennan na Hulanda, y a bin conclui cu e personanan aki ta bisa cu motibo cu no ta hayando yiu, ta debi cu cosnan a bira caro, bida a bira caro, nan no por ‘afford’ pa haya un baby siendo cu tur cos ta carisimo.

   Ta di compronde, cu ora un pais tin menos baby ta nace, e lo tin influencia riba monton di aspecto di e pais, e.o. capacidad di crèche, scolnan, cuido, profesionalnan, etc.

   Nivel di vacunamento: Gino Goeloe di WGK Aruba a agrega, cu algo positivo cu a bin sali afo di e rapport aki, ta cu na Aruba e porcentahe di muchanan cu ta vacuna, ta hopi halto.  E isla a marca un score di 96 pa 97 porciento.  Si bo compar’e cu Hulanda, aya e porcentahe ta apenas 55 pa 60%.  Pesey mes hopi malesa contagioso cu nunca antes tabata existi na Hulanda, diripiente tey bek na Tera Frieu, incluyendo e malesa hopi contagioso cu yama ‘Klinkhoest’, cu ta wordo ocasiona pa e bacteria Bordetella pertussis, y cu ta presenta hopi cerca baby y mucha.  Hulanda tin hopi dolor di cabez cu Klinkhoest.

   Bon mes na Aruba cu e malesa aki no tey, como cu tur hende ta bon vacuna.  Aruba ta score den region di Caribe como mas halto di poblacion vacuna.