En espera di e oportunidad pa sigui contribui na un Reino feliz
*Aruba den union cu Reino a habri un caminda pa futuro
ORANJESTAD (AAN) — Na e momentonan aki un biento nobo ta cuminsa supla den Reino Hulandes cu formacion di un Gobierno nobo pa Hulanda y asina tambe un base nobo pa e Gobierno di Reino, den cual Aruba y tur otro pais den Reino lo ta representa.
Aruba cu un curazon trankil, ta en espera di e Gobierno nobo di Hulanda y Reino cu por sinta na mesa cu un Aruba, cu a base di bon gobernacion a bira ehemplar den Reino.
Awe Aruba ta conoci, cu e exigencianan grandi pa gobernacion di Hulanda y Reino den un futuro, den cual Aruba ta spera di por contribui na forma positivo den realisacion di e base unico di Statuut, cu ta exigi pa nos busca sosten den nos propio forza, pero cu e boluntad pa yuda otro.
E pakete di problemanan cu Gobierno di Hulanda y di Reino mester resolve, no ta contene exigencianan cu no ta conoci na Aruba, cu entre otro mescos cu Hulanda, ta atrae personanan cu for di exterior ta en busca di un futuro nobo, pa motibo di situacionnan lamentabel cu ta destrui e balor di hende, pa cual semper paisnan den Reino a lucha.
E lucha pa integridad humano, ta hustamente e formula cu ta base di e calidad di bida, cu Constitucion y gobernacion a base di Ley, ta entrega e ciudadano di Reino Hulandes.
Cambio pa un mihor futuro, tabata y ta e motibo di lucha di Aruba cu den union cu Reino Hulandes, a soluciona momentonan sumamente dificil cu mundo henter a confronta y cu a deshaci di plannan cu ya tabata formula ora Covid-19 a ataca.
Reino Hulandes cu su diversidad crea pa historia riba tur tereno, awe por fungi como ehempel pa paisnan cu a wordo manca pa falta di derecho humano y mal gobernacion pero basa riba e principionan di estado di derecho, a alcansa reforma.
Den union cu instancianan di Reino, aceptando e guia cu Reino cu mas facilidad pa acumula conocemento tecnico ta ofrece a base tambe di Statuut, Aruba a sobrebibi momentonan sumamente dificil.
Aruba ta reconoce e importancia di e sosten cu el a ricibi den reformacion di su base financiero entre otro, cu mester sostene e felcilidad di su Pueblo.
Na mes momento Aruba ta conciente, cu e Gobierno nobo Hulandes tin un tarea importante su dilanti, pa garantisa na e Pueblo Hulandes, loke Ley ta duna como su garantia.
Statuut ta haci, cu e Gobierno cu wordo forma na Hulanda, lo ta Gobierno di Reino den cual Aruba tambe tin participacion.
Awe Reino Hulandes ta ofrece mundo e posibilidad pa reconoce, cu cooperacion manera incorpora den Statuut di Reino, ta esencial pa, cu respet di e caracter y integridad di cada Pueblo, yega na cooperacionnan exclusivo cu Reino Hulandes ta brinda.
Problemanan cu por separa, mester wordo discuti. Ta hustamente e posibilidadnan di e solo tropical y e frescura di e biento friu na e parti Europeo di Reino ta ofrece, a skirbi historia di un Reino, cu a sobrebibi tempo historico y a bira ehemplar pa formulanan moderno, den cual autonomia di cada pais por cana man den man cu esfuerzonan comun di un Reino.
Aruba den su historia, a lanta para pa su derecho pa construi un nacion di felicidad pa su Pueblo, cu a nace y crece como union mundial ehemplar.
Hulanda awe mester dicidi con na forma democratico, e tuma accion, a base di un bon gobernacion pa e Pueblo Hulandes y un bon gobernacion pa Reino Hulandes.
Aruba a entrega prueba, cu e kier cana riba su propio forza, den un Status Aparte, cu a bira un concepto pa reformacion di Reino, cu awe den cooperacion comun, por logra felicidad di tur ciudadano Hulandes, a base di tolerancia, comprension y respet pa e dignidad di hende, cu ta e base di un nacion y e obhetivo di bon gobernacion.
Statuut, Reino Hulandes y cada pais autonomo den Reino, ta forma un union ehemplar pa un mundo. Aruba como pais chikito, por ehempel, lo tin problema cu su defensa, cu Statuut a pone den man di Reino, cu mester defende e balor material y no material di hende, cu ta keda e figura central den cualkier sistem gubernamental.
