Cientificonan a identifica mas di 50 efecto di termino-largo di Covid-19

Meta analisis publica e siman aki den Scientific Reports

NEW YORK: Pa hopi hende cu a keda contagia cu Covid-19 den forma leve, modera, of grave, e efectonan di e malesa no ta desaparece ora cu e infeccion desaparece.  Un revision sistematico y un meta analisis di cual e rapport a wordo publica e siman aki den e revista Scientific Reports, a descubri cu 80% di e casonan ta produci por lo menos 1 sintoma di termino-largo.

   E autornan di rapport a revisa mas di 18.000 publicacion den busca di estudionan cu a evalua e efectonan di termino-largo di Covid-19 cu por lo menos 100 suheto.  Nan a descubri diescinco estudio, cu hunto a sigui 47.910 pashent durante 110 dia despues di e infeccion.  E ora nan a pone e data hunto pa por discerni e prevalencia di e efectonan secundario cronico.

   “E cinco sintomanan mas comun tabata cansancio (58%), dolor di cabez (44%), trastorno di atencion (27), cabey ta cay (25%), y dyspnea (dificultad di hala rosea) (24%),” segun e analistanan a raporta den e rapport nobo.

   En total, nan a saca 55 sintoma potencial di termino largo cu Covid-19.  Otro efectonan cronico cu a destaca ta e perdida di smaak (raporta den 23% di casonan), perdida di holor (21%), tosamento (19%), sudor (17%), y perdida di oido (15%).

   Algo di lamenta ta cu ningun di e estudionan cu nan a revisa, a wordo traha segun e gravedad di e malesa, pues bo no sa sigur si den caso bo a bira hopi malo door di Covid-19, si acaso esey ta empeora e sintomanan di termino-largo, aunke e ta parce di ta probable.

   “E resultadonan evalua den e estudio aki ta cuadra cu e conocemento cientifico actual riba otro virusnan di corona, manera esnan cu a produci malesa di SARS y MERS,” e autornan a skirbi.  “Por ehemplo, estudionan riba esnan cu a keda na bida despues di a contagia cu SARS a mustra abnormalidad cu nan pulmon pa varios luna despues di e infeccion.”

   E autornan a mustra tambe cu e efectonan di termino-largo di Covid-19 parcialmente ta parce esnan di sindrome di fatiga cronico (CFS), un diagnostico nebuloso y controversial cu actualmente ainda hende no sa kico ta ocasiona esey.  Esnan cu ta sufri di CFS ta pasa malo cu un cansancio severo cu ta laga nan incapacita, dolor, desabilidad neurocognitivo, mal drumimento, y sintomanan global cu ta empeora despues cu bo djis haci un tiki actividad fisico of cognitivo.

   Nan no sa pakico algun pashent di Covid-19 ta experiencia efectonan di termino-largo.  Segun e autornan, kizas genetica, edad, e forma cu e virus a drenta y con hopi, y e nivelnan di inflamacion lo por hunga un rol aki.

   Mirando e hecho cu Covid-19 ta un malesa nobo, ta imposible pa determina con hopi e efectonan aki lo dura, segun e autornan di e rapport a skirbi.