ORANJESTAD (AAN): Den e reunion den Parlamento diahuebs 12 di augustus, Prome Minister di nos pais, Evelyn Wever-Croes a duna splicacion amplio
di e 3 diferente producto di negociacion cu Hulanda: Landspakket, COHO y RAFT. Prome Minister a detaya tambe riba e fiansa cu Aruba a haya di Hulanda durante e tempo cu Aruba no por a logra riba nos propio forsa.
E fiansa aki no tabata solamente pa wanta e aparato gubernamental y tur su garantianan cabes riba awa; cuido medico durante un pandemia, enseñansa durante un pandemia, siguridad di nos pais durante un pandemia y tur desaroyo na momento cu entradanan cay practicamente ful y cu tin cu presta placa pa por cubri tur locual cu tabata gastonan prome cu pandemia y tur loke a bin acerca.
Loke a bin acerca, Prome Minister a splica, ora cu Gobierno a realisa cu hendenan ta bay perde trabou riba gran escala, Gobierno mester a step in. Nunca antes esaki tabata responsabilidad di Gobierno.
Gobierno a introduci loonsubsidie y a yuda en total 7471 trahado ainda luna pasa. E cantidad di persona tabata mas halto na cuminsamento pero awo e ta na 7471 pa un total di 8 miyon florin. E total di tempo a cuminsa ta 128 miyon florin.
Lamentablemente un cantidad basta grandi di a perde trabou tambe cu tambe mester a haya yudansa. Na Juni 3843 persona a haya e ayudo aki pa un suma total desde a cuminsa di 65 miyon florin. Esakinan ta gastonan cu a bin adicional pues no tabata den presupuesto.
Tambe a bin pakete di cuminda cu den e prome lunanan e enfasis tabata riba Cruz Cora cu fondo di Hulanda pero Gobierno di Aruba, Minister di Asuntonan Social tambe a duna su aporte pa duna mas pakete di cuminda ya cu e necesidad tabata hopi halto.
“Asina Gobierno a haci diferente esfuerso pa wanta cabes riba awa como un pais durante e peor crisis cu nos pais a enfrenta. Danki na e vision y e strategia cu nos a aplica nos a logra y aworaki nos ta recuperando. Nos perspectiva tabata cu nos ta recupera pa fin di e aña aki 76% di nos turismo. Aworaki nos ta den un ola nobo. Nos a cuminsa mira cancelacionnan caba p’esey ta mas importante cu nunca pa nos sigui cuida y esunnan cu por of kier por vacuna pasobra esaki ta e unico manera cu nos por recupera. Pues si tur cos sigui bon nos ta recupera pa fin di e aña aki pa turismo cu 76%. Pero si turismo yega 100% no kiermeen ainda cu economia a yega 100% y sigur no financieramente pero nos lo ta riba e bon caminda’, Prome Minister a duna di conoce.
Prome Minister a enfatisa, “Cu e COHO y e RAFT manera nos tin’e aworaki palabra, bo ta wak cu ta bin bek trankilidad y stabilidad. E situacion financiero di nos pais contrario di e situacion economico of turismo, ta hopi delicado prome cu e pandemia caba. Kiermeen cu e pandemia el a bira pio pasobra nos mester a deal cu recuperacion financiero di aña anterior y durante e pandemia”.
