Chispito a bishita Brighter Future Academy durante Connecting Worlds Camp

ORANJESTAD (AAN): N.V. ELMAR su Electra Discovery Tour 2026 a continua su ruta cu su di cinco stop na Brighter Future Academy,

durante Connecting Worlds Camp. Durante e bishita, e muchanan a disfruta di e Poppenkast show educativo di Chispito bou di e tema “Switch On Safety”. 

Brighter Future Academy ta dedica na mehora e calidad di bida di muchanan cu necesidadnan special, ofreciendo educacion y terapia specialisa den un ambiente cu ta enfoca riba desaroyo y empoderamento di cada mucha. 

Durante e Poppenkast show, presenta den colaboracion cu Scol Teatro Aruba TRIBI, Chispito a comparti diferente mensahe di seguridad electrico den un forma ameno y interactivo. Despues di e show, e muchanan a ricibi e figurin oficial di Chispito pa sigui stimula conversacion tocante seguridad electrico na cas. 

Electra Discovery Tour ta un iniciativa di N.V. ELMAR den cuadro di su programa di Corporate Social Responsibility. Pa segundo aña consecutivo, e roadshow ta bishita Summer Camps rond di Aruba, cada aña cu un concepto diferente cu ta combina educacion, seguridad y entretenimento. 

Connecting Worlds Camp na Brighter Future Academy ta e di cinco stop di Electra Discovery Tour 2026. Te awor, e tour a pasa den Santa Cruz cu Stichting Ambiente Nobo, San Nicolas cu YMCA, Paradera cu Alpha Explorers Camp, Piedra Plat cu Centro di Famia, y awor Oranjestad cu Connecting Worlds Camp na Brighter Future Academy. 

Cu cada stop, ELMAR ta acerca e mensahe di seguridad electrico directamente na muchanan den diferente districto y ambiente rond di Aruba. 

Electra Discovery Tour 2026 lo conclui cu su di seis y ultimo stop na ELMAR Oranjestad, na “Cas di Chispito”.