Aruba ta lansa un capitulo nobo den hayazgo y proteccion di su Herencia Cultural Bou Awa

*Colaboracion internacional ta combina experticio local cu tecnologia riba nivel mundial

ORANJESTAD (AAN): Botonan cu a sink y otro herencianan cultural bou awa ta conta e storia di Aruba su pasado maritimo, di intercambio internacional y migracion te na eventonan di guera. E luna aki, Aruba ta tuma un paso importante pa proteha e historia aki door di un collaboracion unico entre Museo Arqueologico Nacional Aruba (MANA), Imagination for Development and the Nature of Values Aruba (IDNOVA), Aruba Conservation Foundation (ACF) y e organisacion internacional di investigacion maritimo Inkfish LLC.  

Harold Kelly (MANA) y Oriana Wouters (IDNOVA) lo drenta den cuarentena na Corsow dia 20 di augustus prome cu subi e barco di investigacion RV Hydra di Inkfish LLC. Esaki ta un organisacion internacional marino cu ta apoya ciencia oceano cu botonan di investigacion superior, tecnologianan inovativo pa cartografia y expedicionnan cientifico multidisciplinario. E expedicion lo tuma luga di dia 25 di augustus te 15 di september 2026, durante cual periodo lo haci investigacionnan rond di costa di Aruba. Esaki ta marca e comienso di un trayecto emocionante. 

Na november 2025 e Agencia Cultural di Herencia di Hulanda (RCE) a train profesionalnan di Herencia di Caribe Hulandes na Aruba, usando metodonan internacional reconoci di UNESCO pa documentacion y proteccion di herencia cultural bou awa. Arkeologonan di MANA Harold Kelly y Raymundo Dijkhoff, hunto cu Shane Thielman di ACF y Oriana Wouters di IDNOVA a representa Aruba. 

MANA, ACF y IDNOVA a pone e entrenamento aki den accion door di documenta e herencia cultural aquatico di San Nicolas Bay, un di e paisahenan maritimo historico mas importante di Aruba, y door di haci un evaluacion nobo di SS Pedernales. Sambuyadonan local y cargadonan di herencia den comunidad, bou guia di Anthony Hagedoorn y Lui Samanez a uni pa diferente di e sitionan di investigacion. Asina ta combina conocemento local cu investigacion cientifico, mientras a crea oportunidad pa transferencia di conocemento entre generacionnan, como tambe arkeologia comunitario responsabel. 

E siguiente capitulo ta cuminsa mas laat den e luna aki cu e expedition di Inkfish LLC. Trahando hunto cu MANA, nan lo yuda identifica, traha mapa di y documenta Aruba su herencia cultural bou awa usando tecnologia ‘state-of-the-art’, incluyendo ‘high-resolution seabed mapping’, ‘3D imaging’ y sistemanan di investigacion den awa hundo. 

Mes un importante ta cu e expedicion lo provee training practico pa investigadornan local, asina enforsando Aruba su mes un capacidad pa maneha y proteha e herencia cultural bou awa pa hopi tempo despues cu e expedicion termina. Harold Kelly y Oriana Wouters lo traha hunto cu e team internacional di investigacion, sigurando asina cu e conocemento y experiencia ta keda na Aruba pa e investigacion y maneho di herencia den futuro. 

Cu un ‘Memorandum of Understanding’ (MoU), firma pa Minister di Cultura, Mike Eman, ta sigura cu tur data cientifico colecta durante e expedicion ta permanece accesibel pa Aruba. E fuente nacional aki por contribui pa investigacionnan futuro, pa educacion y e maneho sostenibel di Aruba su herencia cultural bou awa. 

Fuera di descubrimentonan cientifico, e proyecto ta representa un invercion den Aruba su futuro. E colaboracion lo enforsa e capacidad pa investigacionnan nacional, lo inspira e siguiente generacion di profesionalnan di herencia y yuda preserva Aruba su herencia cultural bou awa unico pa generacionnan. Durante e expedicion, MANA, IDNOVA y Inkfish LLC lo comparti regularmente e ultimo noticianan, pa asina publico haya e oportunidad pa sigui e biahe excitante aki bou lama di Aruba.