Rubiella Toppenberg di FADA:
ORANJESTAD (AAN): Manera cu tin un refuerso den ley, lo bira notabel cu problemanan di maneha auto riba nos careteranan bou di influencia di alcohol lo baha masha hopi mes. Esaki Rubiella Toppenberg di Fundacion Anti Droga Aruba (FADA) a duna di conoce den un entrevista recien cu DIARIO.
Den esaki, establecimentonan cu ta bende bebida alcoholico mester tin un rol grandi. Toppenberg a duna di conoce cu Fada den pasado a pasa tur bar y restaurant riba nos isla pa pone poster di conscientisacion pa no bebe y stuur. Sinembargo, esaki no a duna bon resultado pasobra despues di un siman ta bay controla no ta haya e poster mas.
Segun señora Toppenberg, bar y restaurantnan ta mustra cu di berdad nan kier coopera, pero di otro banda nan no kier perde benta. El a agrega cu na diferente partinan di mundo, si un persona sali burachi di un bar y a comete un accident, e bar ey ta para responsabel. Esaki ta e refuerso di ley cu Aruba tin mester tambe pa baha e problemanan ocasiona door di bebe y stuur.
