Chens unico pa haya sa mas di e obra literario di Denis Henriquez

ORANJESTAD(AAN): Awe  6’or di atardi na Biblioteca Nacional na Oranjestad ta bay tuma lugar presentacion di e obra literario di Denis Henriquez.

   Ta trata di un autor Arubiano cu a nace den Zuidstraat, cu ta tambe e titulo di un di su bukinan.

   Segun Mirto Laclé di Biblioteca Nacional, pesey e anochi yama: ‘Di Zuidstraat pa Klei’.

   “Nos lo cubri tur e caminda cana aki di Zuidstraat na 1992 pa Klei na 2023”.

   Nos ta bay un tiki mas leu tambe, pasobra di aña 1971 pa 1977, Denis studia na Delft y universidad di Leiden ta un teorico fisico y aki pa su creatividad ya caba na 1971 el a cuminza, segun Laclé.

For di e temponan ey hunto cu Burney Every el a dedica su mes tambe na sketches, unda cu nan a hala atencion tambe di politiconan di e tempo ey.

Segun Laclé, ora cu Henriquez a bolbe Hulanda na 1977 el a sigui skirbi y eynan el a hinca teatro y pelicula den esaki.

“Esaki a conduci na produccion di un pelicula riba Dera Gai, cu ta un documentario cu ta patrimonio cultural di Aruba”, segun Laclé.

Henriquez mes durante un conferencia di prensa a splica cu na prome instancia el a studia e matematica di fisica, pero como cu e no a bay traha den esaki el a bira maestro di scol.

“Maestro di scol no tabata suficiente pami, pero mi kier a uza mi creatividad pa skirbi literatura”.

Un buki a bira dos, mi a skirbi obranan di teatro y mi a sigui skirbi buki, segun Henriquez.