Chef Albertsz tin un oferta ariba mesa pa traha cu Disney Cruise

Durante celebracion na Aruba el a laga sa

ORANJESTAD (AAN):  Antonio Albertsz un yiu di tera kende durante 15 aña a ocupa e posicion di Chef na e compania reconoci mundialmente, esta Disney, tabata na Aruba recientemente pa asina celebra e aniversario aki.

            El a bisa cu e ta feliz di por celebra 15 aña cu un compania internacional asina grandi y cu e ta unico yiu di tera y e ta sinti su mes hopi orguyoso. Pa e motibo ey, e kier a comparti e momento special aki cu su hende, su famia.

            E kier pa Aruba sa cu tin un representante internacionalmente trahando den un compania asina grandi, a bisa.

            Chef Albertsz a laga sa cu el a caba su estudio culinario aki na Aruba y un di su soñonan tabata mescos cu yega un compania asina grandi, busca e manera di habri porta pa e alumnonan di Aruba por uza e 'bridge di Disney' pa core stage.

            Despues di hopi tempo y hopi logro ta riba un bon caminda den coordinacion cu Minister Endy Croes y e ta kere cu pronto lo por anuncia un noticia hopi grandi pa Aruba caminda e hobennan den arte culinario por tin oportunidad di core stage na Walt Disney World Resort, a laga sa.

               Esaki lo ta un  oportunidad pa e hobennan den examen klas caminda nan lo por bay den e Disney College Program y unda nan lo wordo prepara den e area cu nan mes kier bay studia, a bisa, sea pa 3 luna, hayando un salario chikito.

            Pa loke ta su posicion den Walt Disney World Resort, el a indica cu e tin e 'top chef position', pero tin un oferta ariba mesa den e ultimo añanan pa dirigi locual ta trata Disney Cruise, pero esey ta den negociacion pasobra su famia no kier muda di Orlando pa Canada.

            Sinembargo, e ta kere cu si esey ta locual destino tin p'e, e lo traha durante e proximo 3 añanan cu Disney Cruise.