Pakico Gobierno kier silencia Marck Oduber
ORANJESTAD (AAN): Siman nobo a cuminza, cu e informacion basta serio presenta door di Milton Ponson di Rainbow Warriors Core Foundation, mihor conoci como ‘Resilient Worlds International’. Ponson a describi esaki como un ‘bom nuclear’ aun mas impactante cu loke por a mira den e pelicula recien riba pantaya grandi di ‘Oppenheimer’.
Ponson a referi cu confirmacion a drenta e siman aki, cu e Meteorologo local cu titulo di PhD den meteorologia, esta Marck Oduber cu segun e ultimo sentencianan di Hues, Gobierno mester a pone bek como Director di Departamento Metereologico Aruba (DMA), sinembargo a wordo poni un banda, y a pone na e puesto como ‘Liaison Officer for Science’ pa Comision Nacional di UNESCO, y cu el a wordo prohibi pa papia riba temanan di meteorologia, subida di nivel di lama, cambio climatico, maltempo severo, tsunami, y temblor.
Pero tin di corda, cu na Juni cu a pasa, Marck Oduber a wordo nombra como President di IOC-Caribe, cu ta un Comision di UNESCO cu ta trata temanan di Oceanografia, y cu porcierto hunto cu World Meteorological Organization ta atende temanan manera cambio climatico, maltempo severo, subida di nivel di lama, y algun otro temanan di Meteorologia en general, pues temanan cu Marck Oduber a wordo prohibi door di Gobierno pa papia di nan.
“Nos tin un situacion hopi straño mes na Aruba,” Ponson a indica. “Bo tin un hende local cu na nivel internacional ta funcionando den un Comision Internacional, unda den e Comision aki tur dia e ta atende e temanan aki, den su trabaonan desplega pa IOC-Caribe ta atende eventonan publico internacional unda e ta papia riba e temanan aki, pero den su mesun pais e no mag di toca e temanan aki.”
Esaki na opinion di Milton Ponson di Resilient Worlds International, ta conoci como e modus operandi semper di Rusia, China, y cualkier ‘pais ehemplar’ comunista unda Gobierno ta dicidi pa e cientifico ta kico nan mag papia of no, si e no ta cumbini Gobierno ora e cientifico contradeci e pensamento meskino di gobernantenan.
E ta kere cu hunto cu prensa, e situacion aki tin di wordo denuncia local- y internacionalmente. Ponson a indica cu ta inaceptable cu un cientifico local ta wordo censura cu bendicion di Gobierno demisionario di Mark Rutte pa e cera su boca, pasobra no ta cumbini ni Gobierno demisionario di Rutte, ni gobierno di Aruba.
“Nos tin cu tene cuenta cu loke tin aworaki ta cana rond na DMA Meteo Aruba ta asina deficiente, cu Gobierno di Aruba mester a cera un ‘service contract’ cu Koninklijke Nederlands Meteorologisch Instituut (KNMI) pa complementa e conocemento cu falta na DMA Aruba pa nan por funciona debidamente,” Ponson a indica.
Milton Ponson a sigui bisa: “Awor nos ta mira cu Bureau Rampenbestrijding Aruba (BRA) a tuma over trabao di Meteo, sinembargo señor Rino Hermans tin ningun conocemento di e tema den cual Marck Oduber ta un experto, y pa cual el a wordo apunta como president di e organizacion internacional di IOC-Caribe.”
Ponson a bisa cu loke ta pasando aki na Aruba ta insolito y pesey nan como Rainbow Warriors International y actuando como activista di Derechonan Humano, nan tin di bati alarma.
“E cos aki ta sintomatico di loke a cumina pasa e ultimo dos aña den Gobierno, a bari for di mesa tur semehanza di democracia, libertad di expresion, y libertad di prensa.”
Segun Ponson, e hecho cu Ministerio Publico, y despues Ministro Ursell Arends te na cierto nivel cu tiki razon, a cuminza ataca prensa y libertad di expresion, ta un cos.. pero ora bo cuminsa censura academiconan gradua pa nan duna nan opinion cu por ta contradictorio na e opinion di Gobierno, e ora basicamente bo a bisa: ‘Democracia no ta existi mas, y Gobierno ta dicidi kico ta berdad, y nan ta dicidi ki ta e berdad cientifico’.
Milton Ponson a studia na Universidad di Leiden, cu ta mesun Universidad unda Prome Ministro di Aruba a studia. E lema di e Universidad aki cu ta existi pa 448 aña, ta ‘Praesidium Libertatis’, cu nifica e bastion di libertad pa por expresa bo mes na defensa di democracia y estado di derecho. Ponson ta kere cu e ta e unico cu a compronde e mensahe aki di Leiden Universiteit. E no ta compronde con awor Ministro Ursell Arends ta permitiendo pa ciencia wordo silencia y riba esey ta pidi Ministerio Publico pa actua contra prensa cu ta vocifera opinion di pueblo.
Milton Ponson como cientifico, y cu su organizacion pa defende derecho humano, ta bay bati alarma y e biaha aki e klapnan lo bay cay te den cara di Mark Rutte y Rob Jetten (Ministro di Clima) pasorba nan a permiti e situacion aki escala, y a nota den un conferencia di cambio climatico y energia teni na Mei 2023, unda organizacionnan cu no tabata cumbini ni Mark Rutte ni Rob Jetten y Gobierno di Aruba pa ta presente, a wordo laga afo. Awor e berdad amargo ta saliendo na cla, esta cu Gobierno di Aruba y di Hulanda ta basa riba comunismo y ta parce cu tin un agenda comunista ta dicta na Aruba.
