ORANJESTAD (AAN): Riba Diaranson, chauffeurnan di Arubus, den e diferente rutan a informa e pasaheronan cu ta subi Bus, cu awe Diahuebs 15 di December nan lo tin un welga completo di 24 ora. Pues lo no tin servicio di Arubus, y esaki ta conta tambe pa bus escolar.
Gerencia di Arubus tambe a confirma esey, mustrando cu nan servicio di Bus lo ta interumpi, for di Diahuebs
mainta 8:00 am, y sigui te cu Diabierna mainta 8:00 am.
Un dolor di cabez pa personanan cu ta usa Bus grandi pa bay trabao. Mas dolor pa hobennan cu ta usa Bus pa bay scol.
Specialmente pa e muchanan di scol, mayornan lo tin cu wak ki alternativa tin pa nan, pa nan yega scol mainta. Generalmente cada klas tin un chatgroup awendia, unda e alumnonan ta comunica un cu otro. Esaki por ta un bon opcion pa mayornan conecta entre nan mes, pa mainta esnan biba den nan vecindario, cu ta hiba yiu scol den auto, por duna un man na esnan cu no tin auto den cas, y cu ta depende por completo di bus escolar.
Y mayornan cu tin nan mes transporte pero ta paga bus escolar pa nan yiunan, por adapta nan orario di salida mainta, pa haci e espacio necesario pa laga nan yiu na scol.
Manera ta conoci, Trahadornan sosteni pa nan Sindicato ta hibando un lucha contra reforma cu gerencia kier introduci na e compania. E accion cu nan a tene Dialuna mainta, aparentemente no a yuda y pesey awor e accion ta escalando.
