ORANJESTAD (AAN): E simannan constante di awacero, acumulacion di awa, y debilidad di tera rond di e camindanan a causa hopi stress riba e red di caminda cu tin na Aruba! Esey ta algo cu e director di DOW, esta Marlon Croes mes a confirma den un entrevista.
E temporada di awacero hopi mas largo aki, a trece cune cu el a ocasiona hopi daño na infrastructura di e isla, principalmente e camindanan di asfalt, y esnan di santo.
E camindanan di asfalt cu tabatin hopi kraak den dje, a bira hopi mas debil ora cu awa yobe y e liquido bay den
e kraak. Asina e awa ta yega na e fundeshi, y esaki ta debilita e parti abao y ta expande e kraaknan aun mas hopi, y ta expande asina e problema y haci’e mas grandi di loke e ta.
Mester di fondo: Problemanan aki cu a bira peor, a bin ta duna DOW basta trabao pa mehora e infrastructura, pero pa haci esey bo tin di mester di fondo. Den e caso aki, Prome Ministro a pidi pa DOW sinta cu Directie Financien pa busca un manera cu por bay traha den un Meerjarenplan Fondsen riba presupuesto, y con e ehecucion lo wordo haci, pa asina por haci mantenimento structural di infrastructura di camindanan di asfalt.
Pesey DOW a cuminza traha riba e Meerjarenplan, y ta inventarizando den siguiente lunanan tur caminda di Aruba, pa pone nan den categoria y check e daño, y pone esaki den un matrix cu e criterianan di funcion di un caretera, cu parametronan di cuanto daño e tin, cuanto cas tin banda di dje, con importante e ta pa e bario, y tur esey lo bay crea e ora un lista di prioridad. A base di esey lo bay traha un plan pa drecha tur e structura di caminda di asfalt na Aruba den siguiente añanan nos dilanti.
E costo pa tur esaki: Segun e Director di DOW, e trabaonan aki lo bay exigi un inyeccion monetario basta substancial, y cu aki e ta referi na alrededor di 250 miyon Florin kizas den 10 aña. E idea ta cu cada aña, DOW por haya un suma di 25 miyon, cu lo yuda pa asina pa 2032 ya Aruba por tin tur su camindanan di asfalt bek den un estado mihor.
Pero esaki ta rekeri cu DOW tin di haya e sumanan aki pa asina por cumpli cu e mantenimento necesario.
Prijs di asfalt tambe a subi: E Director di DOW ademas a elabora riba algo cu kizas hopi hende lo no a pensa riba dje. Mirando cu prijs di crudo a subi, y cu tin mundialmente problema cu e ‘supply chain’, esaki ta trece cune cu e costonan di transporte a aumenta drasticamente, y esaki na su turno ta pone cu e prijs per ton pa Asfalt tambe a subi significantemente.
ing. Marlon Croes aki ta mustra cu DOW lo tin di bay busca otro tipo di manera pa bay traha, ademas di e recap, el a splica cu den simannan venidero nan lo bay cuminza experimenta cu e asina yama “Cold Resurface Applying”, cu ta un otro sistema cu ta andando cu contratista pa mira con por haci mas cu menos placa.
E sistema aki ta uno cu ta hayando mas y mas interes rond mundo, y ta wordo usa pa restaura superficie di caminda na un forma igual y ta resisti slipmento tambe.
Na comienzo di otro aña ta bay haci un sorto di proyecto piloto cu un pida caminda na Aruba, pa check con e Cold Resurface Applying aki lo funciona na Aruba.
Cada caminda tin su proceso pa analisa con grandi e daño ta, y pesey algun caminda tin di bay bora pa check si acaso e daño a yega te na su fundeshi, con grave e ta, y tambe ta hinca den dje e parametro ta cuanto auto ta pasa riba dje tur dia.
A base di esey, nan por traha e mezcla ideal (incluyendo azeta, asfalt bieu, y beton) cu por bay fit den e pida ey cu nan lo tin di renoba. Pesey lo bay usa un tecnologia mas nobo, unda cu no ta djis kita un capa di asfalt y pone uno nobo riba dje, sino cu ta bay trata hasta e fundeshi pa drecha esaki na forma mihor y duradero.
