ORANJESTAD (AAN): Audrey Croes, PR & Communications Manager na ELMAR N.V. a duna un recomendacion na comunidad. El a expresa cu ora cu ta papia di spaar coriente mester papia di consumo consciente tambe.
Segun Croes, un tip cu ELMAR N.V. tin pa esaki ta controla bo meterstand tur dia pa asina tin un
bista riba bo consumo di coriente. "Ta dificil pa nos bisa kico ta un consumo halto of tiki door cu e ta depende di e grandura di e cas, depende di e aparatonan den e cas".
Por bisa si cu e averahe di consumo ta 700 kilowatt/uur pa luna pa loke ta clientenan residencial. Esey kiermen cu nan ta uzando un averahe di 20 kilowatt/uur pa dia y si kier mantene na esaki, e ora door di controla e meterstand tur dia por mira su ta ariba of abao di e 20 kilowatt/uur pa dia y mantene na dje.
Pa fin di aña mester ta un decision consciente ora cu bo ta decora bo cas cu lus pa cumpra lusnan LED cual ta mas eficiente, a bisa.
Tambe ora di organisa un fiesta na cas y cu bo sa cu bo a gasta mas kilowatt/uur pa e siguiente dia baha un tiki e consumo pa balansa e gasto di mas.
Audrey Croes a agrega cu comunidad di Aruba ta educa riba e aspecto aki di spaar coriente, pero e ta kere cu por sigui educa y conscientisa mas y esey ta e deber di ELMAR N.V como compania pa sigui haci esaki.
E grupo meta akinan ta e clientenan postpaid. E grupo cu tin meternan prepago ta paga e cantidad y nan ta uz'e. Nan tin un bista claro di nan consumo, a remarca.
