Chauffeur cu a wordo saca den auto durante accident grave a fayece

Den Havenstraat na Playa

• Polis tin chauffeur di un BMW 116i deteni
• Hawa Ruiz a bira di seis morto den trafico 

ORANJESTAD (AAN): Tabata Diabierna anochi pa 10:56 pm, cu yamada a drenta na Central di Polis, pa splica cu un accidente basta fuerte y hororoso a caba di socede den cayanan di Playa.  Nan a notifica di un accidente entre dos auto na altura di Boolchand’s den Havenstraat na Oranjestad.

   Un unidad di Polis di Playa cu a mobiliza rapidamente pa e lugar, a yega y di leu a mira cu tin un hende benta abao riba caminda.

   Na yegada di patruya ta topa cu e chauffeur benta abao mey-mey di e railnan di tram y gravemente herida.  E ta benta abao net na altura di e trailer di ‘Cosas Ricas’ di Havenstraat 16.  Panort di dje tin un Suzuki compact SUV color shinishi cu number A-26140 cu a dal fuerte contra un palo di luz, y pesey e parti di hood, windshield, y parti di dak a habri y keda kibra.  Mesora Polis a pidi pa manda Ambulans cu urgencia, y a pidi presencia di mas Polis pa asina cera Havenstraat.

   Testigonan a bisa Polis cu tabatin un auto hatchback mas envolvi, pero esaki a sigui core bay.  Kizas tin di bay check security video di negoshinan eybanda, pa mira si acaso e dos vehiculonan tabata pustando of no net prome cu e impacto.

   Dal den palo di luz: Polis lo bay investiga kico a socede ora cu e Suzuki compact SUV a bay core riba e caminda di rails, y si acaso esaki a pone perde control.  Testigonan a bisa cu e Suzuki aki a hala na su man robez, dal den e otro vehiculo cu ta un BMW 116i hatchback kibrando e wantalodo drechi, porta, y spiel banda drechi.  Despues di e impacto ey, e Suzuki den e momentum a bay bek na banda drechi, subi acera y dal fuertemente riba un palo di luz cu tin riba e acera banda panort, net dilanti unda antes tabatin Cha San Supermarket.

   Aki e Suzuki a ‘zwaai rond’ di e palo di lus cu 180º, y finalmente termina cu e parti patras di e compact SUV riba un baki di beton.

   Debi cu e manehador no tabatin seatbelt bisti, e impacto a pone cu violentamente el a sali for di e auto y cay hopi duro riba e suelo abao.  Tabata bisto cu el a haya basta trauma na cabez, y heridanan debi na windshield cu a kibra ora el a pasa door di esaki.

   Ambulans como tambe unidad di Rapid Responder a yega pa asina cuminza atende cu e homber cu ta gravemente herida.  Despues cu nan a logra di stabiliza su curpa un tiki, a haya un chens unico pa bay cune mesora pa Hospital pa tratamento mas avanza.

   Chauffeur di BMW ta deteni: Un poco rato despues, e chauffeur di e BMW 1-Series hatchback a bin bek pa papia cu Polis relata su storia.  Sinembargo ora cu Polis ta papia cune nan a sinti cu su aliento ta hole fuerte na alcohol di uso interno.  Nan a pone flashlight den su cara, y a mira cu su wowo ta basta cora y e ta papia cu un lenga pisa.  A pidi su cooperacion pa haci un test di supla, y el a bay di acuerdo.  Sinembargo e test riba e aparato di Alco Sensor IV a sali malo pe, pues inmediatamente el a wordo deteni.  A manda busca vehiculo di transporte, cu a hiba e detenido pa Warda di Polis na Playa.

   Aki Fiscal Auxiliar a atende e chauffeur ainda bisti den short, y a duna ordo pa e keda deteni, no djis pa buracheria sino pa investigacion di e accident serio.

   Polis a confisca su BMW 116i hatchback color shinishi cu number A-77937.  Cu Takelwagen el a wordo hiba Warda di Polis pa investigacion door di personal di Polisnan forensico di BFTO.  E palo di luz cu el a dal den dje, a keda tur dobla y ta parce cu e siman aki lo bay kite di eynan y pone uno nobo.

   Na e lugar di e sucedido a presenta specialistanan di trafico, polis tecnico, fiscal y Departamento di Slachtofferhulp.

   Na Hospital e victima a wordo poni den unidad di cuido intensivo, como cu e tabata critico.  El a lucha pa keda na bida, pero net despues di 24 ora di tempo, el a sucumbi pa su heridanan.

   Diasabra despues di 11’or di anochi, polis ta wordo informa cu e chauffeur involucra di accidente a fayece na Hospital.

   Docter a constata morto di e homber yama Hawin Harold J. Ruiz mihor conoci como ‘Hawa’.  E ta naci na Aruba dia 26 januari 1992, pues tin 31 aña di edad. E ta e di seis morto den trafico pa aña 2023.

   Cuerpo Policial ta informa cu e caso ta bao investigacion y e curpa a wordo confisca riba ordo di fiscal. Alabes a splica cu e chauffeur di e BMW 116i ainda ta deteni den e caso aki.

   Hawa Ruiz a bay laga dos yiu atras y demas famia.  Na famianan di e fayecido, DIARIO como tambe Cuerpo Policial Aruba ta manda palabra di profundo condolencia.