ORANJESTAD (AAN): Otro siman, esta Diamars dia 13 di februari pa 7’or di anochi lo tin un charla na Universidad di Aruba (Room A) tocante e relacion entre cambio di clima, cultura y sociedad.
E charla aki ta worde organiza pa e proyecto di investigacion ‘Isleñonan na Timon’ (Island(er)s at the Helm). Dr. Francio Guadeloupe lo duna un introduccion tocante e importancia y balor pa studia efectonan di cambio di clima y con esaki ta worde experencia pa e hende y e sociedad. En general e topico di cambio di clima ta worde mira y discuti den termino di solucion judicial, economico y tecnico. Durante e introduccion aki lo tira un bista ariba e problematica di cambio di clima for di e perspectiva di herencia cultural y cultura popular.
Harold Kelly, arkeologo di Museo Arqueologico Nacional Aruba (MANA) y candidato doctorado arkeologia (Ph.D) lo despues duna un charla tocante su investigacion. E lo splica duna un splicacion di e resultado nan preliminario di su investigacion tocante conocimento tradicional y indigeno y e transmision di e conocimiento aki den sociedad di awendia. E evento lo ta na ingles.
Esnan cu kier aplica tin di haci esaki online na:
Cambio di clima ta un problematica cu ta afecta henter mundo, incluyendo e area di Caribe. Tin indicacion cientifico cu e bida diario di isleñonan lo mira cambionan drastico na aña 2050 caba, por ehempel cambionan na e costa di nos isla. Pa motibo di e indicacion nan aki a dicidi di investiga e forma cu habitantenan di e islanan ABCSSS ta adapta na cambio di clima y inventarisa ki tipo di adaptacion ainda ta necesario.
Island(er)s at the Helm ta un proyecto di investigacion di cinco aña cu a cuminsa na 2021. E ta worde financia pa NWO (Nederlandse Organizatie voor Wetenschappelijk Onderzoek) y ta worde organiza pa Koninklijk Instituut voor Taal, Land en Volkenkunde (KITLV). Tur seis isla caribense den Reino Hulandes ta forma parti di e proyecto aki.
Pa esnan cu ta interesa pa haya sa mas tocante e proyecto di investigacion por sigui e website:
DIARIO sin duda alguno ta sugeri e interesadonan pa registra rapido pa e evento.
