Reunion entre Minister Geoffrey Wever, AFTA y ACM na Hulanda
ORANJESTAD (AAN): Durante su bishita na Hulanda, Minister di Asunto Economico, Communicacion y Desaroyo Sostenibel, sr. Geoffrey Wever, Directora di Departamento di Asuntonan Economico señora Maria Dijkhoff-Pita y voorzitter di Aruba Fair Trade Autority (AFTA), Sr. Filomeno (Roly) Sintjago, a probecha e oportunidad pa profundisa nan conocemento y comprension di e rol y operacionnan di e Autoriteit Consument & Markt (ACM).
E encuentro cu sr. Martijn Snoep, voorzitter di bestuur di ACM, y otro miembronan y expertonan prominente den Proteccion di Consumidor a sirbi pa intercambio di idea y pa fortalece un base di colaboracion entre ACM, Aruba Fair Trade Authority (AFTA), y Ministerio di Asunto Economico di Aruba.
E minister di asuntonan economico (y tur futuro minister) lo tin un rol limita den operacionnan di Aruba Fair Trade Authority (AFTA). No obstante, e bishita a clarifica e cuadro den cual e minister por apoya e esfuersonan pa proteccion di consumidor sin interveni directamente den investigacionnan of decisionnan specifico. E enfasis ta keda riba e necesidad pa mantene transparencia y eficiencia operacional di AFTA, segurando cu AFTA ta actua den conformidad cu ley, y ta uza su presupuesto den un manera efectivo.
Ademas, e presencia di sr. FIlomeno (Roly Sintjago), voorzitter di AFTA, y e miembronan di bestuur di AFTA, Sr. Martijn Snoep y Sr. Matthijs Visser, hunto cu minister Geoffrey Wever na e reunionnan cu ACM a demostra e compromiso y interconectividad entre e organizacionnan involucra. Señora Maria Dijkhoff-Pita, directora di departamento di Asunto Economico, tambe tabata t'ey presente. E ta enfatisa e importancia di continuidad y coherencia den e maneho di mededinging y proteccion di consumidor pa futuro, no obstante cual gobernacion.
Minister Wever ta agradecido pa e dialogo y intercambionan durante e bishita. E ta resalta e rol crucial di colaboracion, communicacion, y transparencia entre e ministerio di asuntonan Economico di Aruba, ACM na Hulanda, y AFTA. E lazonan entre e entidadnan aki ta esencial pa garantisa un proteccion efectivo di e consumidor, y pa promove un mercado saludabel cu competencia husto.
