Rulienne Arends, Trahado Preventivo FADA:
ORANJESTAD (AAN): Rulienne Arends, Trahado Preventivo Fundacion Anti Droga Aruba (FADA) a duna un entrevista na DIARIO, na unda el a splica cu pa algun aña caba, nan ta haci un research riba topiconan ta presenta cerca e hoben y muchanan, nan a cay tambe riba e parti di musica. Y hopi cantica internacional, sea na ingles of na spaño, por haya e contenido relaciona cu substancianan, sea legal of ilegal, y den cuadra di esey, nan tin un charla yama 'Influencia di Musica', cu specificamente nan ta usa como ehempel cancionnan cu ta hopi conoci y pega, cu ta bisa explicitamente pa usa droga manera marijuana, dal extasis, cocaina. Tin cantica cu otro nomber ta wordo usa, pero si ta ilustra droganan.
FADA ta presenta esaki na muchanan den scol basico, pero den direccion manera con un cancion por tin influencia riba un persona. Loke hende ta wak of scucha, nan tambe ta haci mesun cos. Asina nan ta concientisa e muchanan cu si ta e 'beat' di e cancion nan ta gusta, e ta ok. Pero mester tene cuenta kico ta e mensahe cu nan ta trece dilanti, pa nan no ripiti esaki y no actua di e forma cu e cantidad ta bisa y tampoco ta actua di e forma cu e videoclip cu a wordo crea.
FADA ta enfoca hopi riba norma y balornan, y nan ta duna e charla aki na muchanan di derde klas di scol basico. Nan por a compronde cu awendia tin varios cantica na Papiamento cu ta papia riba droga, y nan no ta bay cambia e contenido di e charla, pasobra esaki ta algo cu ya nan ta enfoca riba dje.
Arends a indica cu pa nan ta importante e comportacion di e hobennan pa no bay tras di loke nan ta scucha y mira. Pero esaki ta un parti di loke FADA por haci, e otro banda ta keda di cas. Ta importante pa mayornan of esnan cu ta cuida e mucha y hobennan pa enfoca riba norma y balornan. FADA por brinda conseho, informacion y concientisacion, pero nan no por haci tur cos nan so. Hobennan mester compronde ki tipo di mensahe nan ta siguiendo y e banda positivo y negativo cu nan mester tene cuenta cu ne.
