NV Elmar cu mensahe na publico
ORANJESTAD (AAN): Un biaha mas, e compania NV Elmar ta manda un mensahe claro pa publico cu a haya Kavel y ta pensa di pone Tent of Trailer riba dje.
Esey ta pa NO claba penchi den tera riba rutanan di carnaval pa evita riesgo di electrocucion.
E compania di electricidad ta corda y particularmente e personanan cu haya kavel den e area di Vondellaan, L.G. Smith Boulevard y riba ruta di carnaval na San Nicolas, pa evita di claba staca of penchi den acera of tereno publico.
Den hopi parti di Aruba, tin un infrastructura electrico bao tera cu ta inclui kabelnan di 60 kiloVolt, esencial pa suministro continuo di coriente na cas y negoshinan. Claba staca of penchi den tera sin e informacion necesario ta crea un riesgo electrico real y significativo di worde electrocuta, tanto pa esnan cu ta ehecuta e accion como pa esnan den e area.
NV Elmar ya caba a ricibi alerta cu tin persona cu ta claba staca y penchi den acera of tereno publico sin considera e mapa di e kabelnan, aumentando e posibilidad di situacion peligroso. Pa preveni riesgonan innecesario, nos ta recomenda personanan cu haya kavel pa opta pa solucionnan alternativo, manera saconan di santo, peso, of piedra, enbes di bora den tera pa ancra.
