Charla ‘Anhelo di Libertad: Sclavitud y Resistencia’ na Archivo Nacional di Aruba

Maafa tabata un di e sistemanan di comercio di catibo mas extensivo y violento cu a afecta e continente Africano

ORANJESTAD  (AAN):  Na ocasion di conmemora Dia di Tula, 230 aña despues di e rebelion di Tula na Corsou, na Archivo Nacional di Aruba a presenta un charla titula “Anhelo di Libertad: Sclavitud y Resistencia”, dirigi pa Ramon Todd Dandaré (Mag. Ling.). E evento a tuma luga diasabra 16 di augustus ultimo.

E presentacion pone atencion riba e historia largo y doloroso di sclavitud, tanto den Africa mes como den e mundo mas amplio. Segun Dandaré, comercio di catibo transatlantico – conoci tambe como Maafa (un termino Kiswahili cu ta referi na desastre y calamidad) – tabata un di e sistemanan mas extensivo y violento cu a afecta e continente Africano.

A chica tur sanger di e continente Africano su recursonan humano door di tur ruta posibel: a traves di Sahara, Lama Cora, for di e hafnan di Ocean Indico y a traves di Atlantico. Por lo menos dies siglo di sclavitud a beneficia mundo musulman (for di siglo nuebe pa siglo diesnuebe) y casi cuater siglo e continente Europeo y Merca.

A exporta cuater miyon hende sclavisa a traves di Lama Cora, otro cuater miyon a traves di e hafnan Swahili di Ocean Indico, aproximadamente nuebe miyon riba e ruta di e caravananan transsahariano y diesun pa binti miyon (dependiendo di e autor) a traves di Ocean Atlantico.

Akinan el a splica: (Maafa, ‘un termino Kiswahili pa desaster, calamidad of suceso teribel’ pa describi e historia di e atrocidadnan ocasiona riba e pueblonan Africano (crimen contra humanidad) y un invitacion na hende di descendencia Africano ‘pa honra nos antepasadonan cu a sufri door di e transportacion transatlantico (Middle Passage) y e bidanan cu a sigui comprometi pa via di racismo y opresion’)

Un di e expresionnan mas poderoso y dramatico asocia cu e fenomeno di sclavitud ta hustamente e lucha pa scapa di dje. E lucha tenaz di catibo pa libra nan mes for di sclavitud ta cuminsa for di e momento mes cu ta captura nan den e teranan Africano, riba barco di catibo, riba e biahe pa nan destinacion final y unabes den e Mundo Nobo: den cunucu, hacienda, mina y tayer pa unda tabata destina nan.

Hopi catibo Africano no tabatin otro opcion cu busca libertad cu forsa, uza varios practica destructivo y violento: resistencia, huida, rebelion y revolucion tabata e formanan di oposicion tenaz cu e catibonan tabata uza pa redimi nan mes for di nan condicion y pa confronta e regimen di catibo implementa pa e colonisadonan Europeo.

For di loke awendia ta Merca te na Argentina y for di cuminamento di siglo 16 te final di siglo 19 tabatin movemento di catibo insurgente cu tabata bringa pa nan libertad, Ramon Todd Dandaré a duna di conoce durante e charla interesante aki. (potret: Archivo Nacional Aruba).

Keda pendiente pa mas relato.