Kar-Lie Angelina:
*Falta di informacion of informacion incompleto, entre otro, ta hunga un rol
ORANJESTAD (AAN) – Kar-Lie Angelina, di Verius Business Solutions, den entrevista cu DIARIO a comenta cu na Aruba tin hopi inseguridad, pa loke ta trata asuntonan di belasting.
El a expresa cu, of e informacion no ta yega camina e mester yega, of no tur informacion ta yega su destino. Of ta haci cambio di maneho y ora ta bay riba website no por haya e informacion cu tabata eyriba.
Esaki ta parti di e problema y tambe cu nos ta biba den un isla multilingual, Aruba su leynan ta na Hulandes, anto esey tambe ta causa un problema, pasobra tin hopi hende cu no a haci nan estudio na Hulandes, no a haya educacion na Hulandes, anto nan no ta comprond’e, y hopi hende no tin e tempo of no ta domina e otro idioma asina bon cu nan ta evita di splica un hende of dun’e contesta riba su preguntanan.
Kar-Lie a señala cu e ta haci lo contrario, pasobra e si ta kere den empodera hende cu conocemento.
Tin hende cu no sa con pa yena su aangifte di BBO, y e ta kere cu un hende cu tin negoshi mester ta empodera den sentido cu no solamente e ta cumpra e producto y ta bend’e. E parti financiero ta mes importante pasobra a base di esey e ta tuma decisionnan den su negoshi. No por t’asina cu e ta warda dos, tres aña pa un jaarrekening, pasobra e ora ey e ta laat. E ta kere mas den administracion ‘up to date’, unda cu e hendenan por tuma decisionnan basa riba informacion real na e momento, no despues.
Otro problema cu tin ta cu hopi hende no compronde e asunto di belasting den frontera ni e invoerrechten, y ta bruha e dos cosnan aki den otro.
Y si nan no ta haya informacion den gruponan mas amplio, sea cu lectura of tayer di trabao, y e ora ey ta crea, sin cu e comerciante kier, problema cu belasting, pasobra por ta e no ta declarando e ora ey loke e mester declara. Pero e ora ey ta facil pa bisa cu e persona no ta haciendo e bon. E persona mester haya e informacion bon pa hacie bon, y aki ta un di e aspectonan unda señora Kar-Lie ta yuda.
